SuperDizionari

confin s.m.
(con-fin)

Limit di une superficie, di un teritori individuât daûr di un ciert criteri, par esempli aministratîf, istituzionâl, linguistic, climatic, di proprietât e v.i.

sinonimi

frontiere, ôr

esempi

"«E ce jentrial il confin!» al rispuint Agnul. «Di cuant incà si puedial dividi lis patriis cuntune stangje! I confins a servissin par dividi lis aministrazions, ven a stâi i stâts, no lis patriis»"

da "I furlans e la patrie" di Riedo Pup

"si tirin vie dutis lis boschetis, i arbui a confin dai cjamps i baraçs, par sacomâ une campagne desolade"

da "Un Friûl difarent: i 90 mhz di Onde Furlane" di Max Mauro

"i furlans a lavin in tribunâl cuasi simpri par contindi su confins, su transits, su servitûts di curtîi e di stradelis, su divisions di cjamps e di boscs, di cjasis e di imprescj"

da "Il furlan al jentre in tribunâl" di Riedo Pup

Vedi anche: cunfin, canfin

confin s.m.
(con-fin)

Piere, pâl, stangje e v.i. che a segnin il limit di un teritori

sinonimi

clap, pâl, piere, sbare, stangje, tiermin

esempi

"il gjeometre al à verificât la posizion dai confins"

confin s.m.
(con-fin)

Massime tal pl., part, puest plui lontan

sinonimi

cei, estrem, fin, frontiere, limit, limit estrem, misure, ôr, rivâl, tiermin, ponte

esempi

"al jere corût vie, cence viodi nissun, dome cu la voie di scjampâ…, di scjampâ fin sui confins dal mont, che a 'ndi fossial stade strade di cori"

da "Varc di confin" di Maria Forte

confin s.m.
(con-fin)

Misure di polizie, che si usave massime sot dal fassisim, che e obleave a vivi intun lûc lontan dal comun di residence par un timp determinât

esempi

"i àn fate nome la denunzie e chel puar diaul al scugnì lâ al confin jù pes Calabriis nome par vê dite che in Abissinie nol ocoreve lâ, che la Abissinie, nô, le vin in cjase"

da "Chei di Cjasarse" di Alan Brusini

confin s.m.
(con-fin)

Limtit che al segne la distinzion jenfri robis che no son o che no àn une superficie, ancje astratis (fig.)

sinonimi

limit

esempi

"la sô realizazion e il so bon esit a dipendin de disponibilitât dai insegnants a modificâ il mût di lavorâ e a superâ i confins de lôr dissipline par vierzisi a colaborâ cui docents des diviersis materiis"

da "Educazion plurilengâl tes scuelis furlanis" di Alessandra Burelli

"i podês e lis facoltâts dal president de Republiche a son pluitost scjarsuts e lamiuts; e i confins di competence che la costituzion i à pastanât intor a son une vore strets"

da "Il sierai dal Quirinâl" di Riedo Pup

monolingue