SuperDizionari

contindi v.tr.
(con-tin-di)

Dî alc cun sigurece, ancje cuintri de opinion di altris

sinonims

confermâ, dî, declarâ, proclamâ, professâ, ribati

esemplis

" in paîs al è dut un momò e la int e je insuride cuintri di lui. A contindin che al à cjolte la machine cui bêçs de glesie"

gjavât fûr di "Pre Pitin" di Antoni Beline

"i oms a cirivin di difindile e di contindi che lis acusis cuintri di jê a jerin dutis bausiis"

gjavât fûr di "Il dolfin" di Carlo Sgorlon

"O contint di jessi inocent!"

gjavât fûr di "Vieri e gnûf" di Pieri Piçul

Viôt ancje: cuntindi

contindi v.intr.
(con-tin-di)

Discuti in maniere animade

sinonims

discuti, cuistionâ, contestâ, barufâ, litigâ, rebecâ

esemplis

"intant che Toni e il funzionari a contindevin sul confin, rivà la 'Sese dute sbarlufide corint, convinte che Toni al tacàs une altre barufe"

gjavât fûr di "La cjase di Toni" di Tarcisio Venuti

"e jere dome la voie di no contindi che i meteve in bocje peraulis cussì pôc sintudis"

gjavât fûr di "Cjase di Dalban" di Maria Forte

contindi v.intr.
(con-tin-di)

Jessi impegnât intun scuintri, intun contrast o ancje intun confront, une gare e v.i. cun cdn.

sinonims

contrastâ, batisi, competi

esemplis

"la Cravuazie di chei agns e viodeve cuatri ideis politichis contindi e trussâsi une cu la altre"

gjavât fûr di "Storie di Min" di Ivano Urli

contindi v.tr.
(con-tin-di)

Cirî di otignî alc in competizion cun altris

sinonims

contrastâ, disputâ

esemplis

"pe regjon o sin ca noaltris; ce covential che si fasin indenant altris di lôr a contindinus la strade?"

gjavât fûr di "Diferencis" di Josef Marchet

"doi biei voi, e un biel sen tesaur di amôr, / tra lôr contindin di belece il vant, / brilin chei neris voi plui dal diamant, / supare il sen di perle il biel candôr"

gjavât fûr di "I, 18" di Ermes di Colorêt

monolengâl