SuperDizionari

cuote s.f.
(cuo-te)

Sume che ogni membri di un grup al à di paiâ o di scuedi

esemplis

"o paiarai la cuote dal condomini par dut l'an e la justadure dal brusadôr"

gjavât fûr di "Chê dì che al neveà a Vignesie" di Agnul di Spere

"la partecipazion ai incuintris e je vierte ai socis. La cuote associative pal 2015 e je di 20 euros"

gjavât fûr di "«In file» cui eretics dal Friûl" di Erika Adami

cuote s.f.
(cuo-te)

Cuantitât di alc, ancje no di bêçs, rispiet a un totâl

esemplis

"la Regjon e à la facoltât di indicâ pe cuote dal 20% dal orari scolastic dissiplinis di interès regjonâl"

gjavât fûr di "Memoriis di politiche linguistiche" di Adrian Cescje

cuote s.f.
(cuo-te)

Cuantitât in gjenerâl, ancje cence un rapuart cuntune sume totâl plui grande

esemplis

"stant dome aes statistichis uficiâls, che no misuravin i flus clandestins, la migrazion temporanie furlane e je cressude in maniere costante: se tal 1876 a partivin 25-30 mil emigrants, tal 1890 la cuote e leve a cirche 50-60 mil unitâts"

gjavât fûr di "La emigrazion furlane in Austrie e in Gjermanie" di Matteo Ermacora

cuote s.f.
(cuo-te)

Permès di cjaçâ par un ciert timp o un ciert numar di bestiis intune risierve di cjace

esemplis

"lis cuotis de risierve no son individuâls, si pues vendilis o lassâlis a amîs"

cuote s.f.
(cuo-te)

Tes scomessis, cifre calcolade daûr dal rapuart tra la sume metude sù e chê che si vinçarès

cuote s.f.
(cuo-te)

Altitudin a pet dal nivel dal mâr

esemplis

"scuadre dopo scuadre, a vignivin jù di Cime Pâl Grant, di cuote 1700, di Pas Cjaval, di Siele Freikofel, dal Gam Spitz"

gjavât fûr di "La gleseute dai alpins" di Pieri Menis

"in cheste fasse [la Troposfere] la temperadure, pal solit, e cale par ordin che la cuote e cres"

gjavât fûr di "Notis di meteorologjie pal Friûl - Vignesie Julie" di Stefano Micheletti, Marcellino Salvador

cuote s.f.
(cuo-te)

(sport) Ponts di un concorint o di une scuadre intune competizion

esemplis

"a mieç campionât la prime e je a cuote 24"

cuote s.f.
(cuo-te)

(gjeom.) In gjeometrie descritive, distance di un pont di un plan orizontâl, che e pues sei positive o negative daûr che il pont al è sore o sot dal plan

cuote s.f.
(cuo-te)

(gjeom.) In gjeometrie analitiche, numar che intun sisteme di as cartesians ortogonâi al da la distance di un pont dal plan individuât dai as des assissis e des ordenadis

cuote s.f.
(cuo-te)

(tecn.) Tal dissen tecnic e architetonic, misure planimetriche e altimetriche di ce che si rapresente

monolengâl