SuperDizionari

cuvierzi v.tr.
(cu-vier-zi)

Meti alc parsore, denant, intor di une robe par parâle, protezile, scuindile e v.i.

sinonims

taponâ

esemplis

"meti [la creme] in terinutis o scudielis individuâls e cuvierzi cun pelicule a contat, in maniere che nol fasi la piel"

gjavât fûr di "Menjar blanc" di Sandri Carrozzo

"lis cuessis di purcit a vegnin selezionadis e netadis. 24-48 oris dopo a vegnin cuviertis di sâl (tant che a son i chilos di pês) e conservadis a une temperadure jenfri 0 e 4°C"

gjavât fûr di "Un persut unic par un lûc unic" di Oscar Puntel

cuvierzi v.tr.
(cu-vier-zi)

Stâ parsore, denant o dulintor di une robe cul efiet di parâle, protezile, scuindile e v.i.

sinonims

taponâ

esemplis

"la piergule de ue e jere un ricam in trasparint, che al cuvierzeve di vert un toc dal curtîl"

gjavât fûr di "Cjase di Dalban" di Maria Forte

"une nêf minudine, glaçuline, e jentrave pes fressuris des puartis e dai barcons, e cuvierzeve di blanc il fen sui toglâts"

gjavât fûr di "11 di Fevrâr 1929" di Pieri Somede dai Marcs

"il mûr par difûr al à la stabilidure che e cole jù a tocs e lu cuvierç la elare"

gjavât fûr di "Ricuarts e inlusions" di Enrico Martina

cuvierzi v.tr.
(cu-vier-zi)

Protezi il cuarp dal frêt, dal aiar o ancje dal soreli, dal cjalt e v.i. cun vistîts o altri

sinonims

taponâ, tapossâ, intapossâ

esemplis

"un sialet i cuvierç lis spalis"

gjavât fûr di "I forescj" di Alan Brusini, Gian Paolo Linda

"la mari no ja ce dâi di mangjâ, ne sa cun ce cuviarziju nel Inviar, cun ce socoriju ne lis malatiis che vegnin"

gjavât fûr di "Il me paîs" di Federigo Comelli

cuvierzi v.tr.
(cu-vier-zi)

Jemplâ o tornâ a jemplâ

sinonims

colmenâ, imbunî, implenâ, incolmâ, taponâ, jemplâ

esemplis

"cuvierzi lis busis cu la tiere e pescjâ il cjamp cul fin ancje di protezi lis semencis dai uciei"

gjavât fûr di "La preistorie in Friûl" di Andrea Pessina, Gaetano Vinciguerra

cuvierzi v.tr.
(cu-vier-zi)

Jessi parsore di une superficie, di un lûc e v.i.

sinonims

jemplâ, cjapâ

esemplis

"framieç dai vignâi a son boscs di rôl e faiâr, che a cuvierzin soredut i çucs plui alts e lis cuestis plui in ombrene"

gjavât fûr di "La culine furlane" di Mauro Pascolini, Andrea Guaran

cuvierzi v.tr.
(cu-vier-zi)

Di un sun, sunsûr e v.i., jessi sintût parsore di chei altris

esemplis

"cun la sô vosone al cuvierzè lis ucadis dal popul"

gjavât fûr di "La cjase di Toni" di Tarcisio Venuti

"a passavin un daûr l'altri i cjars dai «paurs» tirâts di cjavalons neris, ros e blancs, plens di int parsore che e bacanave tant di cuvierzi il sdrondenâ des ruedis sul stradon"

gjavât fûr di "Tal bosc di Kebespok" di Pieri Menis

cuvierzi v.tr.
(cu-vier-zi)

Dâ protezion, garanzie, sigurece

sinonims

protezi, sostignî

esemplis

"o jerin cuvierts di un at formâl dal tribunâl"

gjavât fûr di "Interviste a Amato De Monte" di Christian Romanin

cuvierzi v.tr.
(cu-vier-zi)

[TS] (bancj.) Garantî di risis o pierditis, pal plui cun sigurazions

sinonims

sigurâ

cuvierzi v.tr.
(cu-vier-zi)

Fâ in maniere che alc, massime di negatîf, disonest, difietôs e v.i., no si viodi o no si capissi

sinonims

mascarâ, platâ

esemplis

"la acuse di incompatibilitât de sielte di Lamuela cui criteris e à l'intindiment di cuvierzi la incoerence di cui che nol acete il so sisteme"

gjavât fûr di "Memoriis di politiche linguistiche" di Adrian Cescje

"une manfrine ripetude masse dispès ancje in dì di vuê, par cuvierzi o piês par justificâ intrics e robariis"

gjavât fûr di "Cuintristorie dal Nûfcent 1990-2000" di Angelo Floramo

cuvierzi v.tr.
(cu-vier-zi)

Cjapâ dentri, includi (fig.)

sinonims

abraçâ, comprendi, considerâ, contignî, imbraçâ, includi, riferîsi, ripuartâsi, rivuardâ, sierâ dentri, tocjâ

esemplis

"promovi une produzion linguistiche che e cuvierzès dutis lis formis de comunicazion publiche"

gjavât fûr di "Memoriis di politiche linguistiche" di Adrian Cescje

cuvierzi v.tr.
(cu-vier-zi)

Sodisfâ lis esigjencis di une funzion, di un servizi e v.i.

esemplis

"il numar di docents iscrit te Liste nol jere suficient a cuvierzi dutis lis classis"

gjavât fûr di "La tutele de lenghe furlane a scuele" di Patrizia Pavatti

"par cuvierzi i puescj di responsabil di cualifiche dirigjenziâl o di alte specializazion si pues cjapâ personâl a contrat a timp determinât "

gjavât fûr di "Statût de Provincie di Udin" di Aministrazion Publiche

cuvierzi v.tr.
(cu-vier-zi)

Dal mascli, spec. di une bestie, fâ l'at sessuâl, fecondâ

sinonims

montâ

esemplis

"puartâ a cuvierzi la vacje"

monolengâl