SuperDizionari

disponi v.tr.
(dis-po-ni)

Meti intun ciert puest, intune cierte posizion, intun ciert ordin

sinonimi

comedâ, comodâ, deponi, distribuî, logâ, plaçâ, poiâ, poni, puestâ, rangjâ, regolâ, ripartî, sistemâ, colocâ, meti

esempi

"un altri che al puarte trê cjandelutis, lis dispon come Diu comande su la taule, lis pie"

da "Storie di Min" di Ivano Urli

"si rindeve ben cont che cence disponi la resistence tai lûcs strategjics no si sarès podût fâ front a une ofensive dai todescs"

da "Zuan Batiste Cavedalis - Une vite esemplâr" di Giovanni Pillinini

disponi v.tr.
(dis-po-ni)

Fâ che alc al sedi pront

sinonimi

cuinçâ, parecjâ, prontâ, rangjâ, regolâ, preparâ

esempi

"se a vessin cjâf, si metaressin daurman a disponi il teren par che la gnove sistemazion e puedi jessi graduâl e seguitive, cence grandis scossis e grancj disordins"

da "Su altris fondis" di Josef Marchet

"preparâ la cussience nazionâl ladine e disponi lis facendis in mût che no si verifichin plui invasions armadis che [a]puartin lu stermini des nestris tieris e des nestris cjasis"

da "Il lunari mai jessût - Tellini te prime vuere mondiâl" di Donato Toffoli

disponi v.tr.
(dis-po-ni)

Fâ vê un ciert estri, umôr e v.i.

esempi

"une partide in cuatri che e disponeve il so stomi a gjoldi la cene"

da "Cjase di Dalban" di Maria Forte

disponi v.tr., v.intr.
(dis-po-ni)

Ancje ass., stabilî a nivel uficiâl o cun autoritât

sinonimi

comandâ, conciertâ, conseâ, decretâ, deliberâ, destinâ, fissâ, ordenâ, prescrivi, risolvi

esempi

"la interuzion anticipade de incarghe e pues jessi disponude cun proviodiment motivât dal sindic"

da "Statût dal Comun di Udin" di Aministrazion Publiche

"se ducj nus bandonin, nus judarìn bessôi. Dio che fedi il rest: no uarìn che nissun disponi di nô, senza di nô"

da "La seconde Irlande" di Carli Pup

disponi v.intr.
(dis-po-ni)

Decidi ce fâ, cemût doprâ alc e v.i.

sinonimi

decidi, destinâ, comandâ

esempi

"vô o sês libare di disponi de vuestre robe cemût che o volês"

da "Un testament" di Pieri Somede dai Marcs

"a van fevelant indenant dal plui e dal mancul, fin che 'Sefon al dispon di lâ a pognisi"

da "Culumie" di Meni Ucel

disponi v.intr.
(dis-po-ni)

Vê facoltât di doprâ

sinonimi

doprâ, servîsi, utilizâ

esempi

"si cjatave di bessole e cence un carantan di podê disponi"

da "Il muc" di Roberto Ongaro

"l'apartament di vie Volturno al fo un afâr pe Cooperative di informazion furlane, che e rivà a disponi ancje de terace dulà meti la antene"

da "Un Friûl difarent: i 90 mhz di Onde Furlane" di Max Mauro

disponi v.intr.
(dis-po-ni)

Dite di un edifici o di un ambient, vê a disposizion, in dotazion

sinonimi

vê

esempi

"mi soi dome inacuart, tal rivâ, di trop grandone che e jere la preson e che e disponeve di un grant plaçâl"

da "Storie di Min" di Ivano Urli

monolingue