SuperDizionari

dominâ v.tr., v.intr.
(do-mi-nâ)

Vê une autoritât superiôr, un podê assolût o une vore fuart suntun teritori, suntune comunitât e v.i.

sinonimi

comandâ, paronâ, rezi, sorestâ

esempi

"i Messens, che a jerin cuintri i Spartans che ju dominavin di secui"

da "Viaç aes origjins dal Logos" di Adrian Cescje

"Antoni di Savorgnan che al dominave, sence sedi re, dut il Friûl, profitànt di chest malumôr, al metè sù il popul di Udin che [...] al fasè stragje dai nobii"

da "Il Strolic furlan pal 1935" di Redazion SFF

dominâ v.tr., v.intr.
(do-mi-nâ)

Tignî cdn. in cundizion subordenade, spec. a nivel psicologjic

sinonimi

comandâ

esempi

"il concet di dominâ cualchidun al nas de pôre che chel cualchidun al à di pierdi ce che al à"

da "Libertât: il misteri e la sfide" di Laurin Zuan Nardin

dominâ v.tr.
(do-mi-nâ)

Spec. di convinzions, sintiments, sensazions e sim., jessi cussi fuarts di controlâ une persone, di determinâ lis sôs sieltis, la sô cundizion psicologjiche e sim.

esempi

"chel pôc che o savevi di sigûr al jere chest, che la vite e jere une mission, e che il sintiment dal dovê le dominave"

da "Il dolfin" di Carlo Sgorlon

dominâ v.tr., v.intr.
(do-mi-nâ)

Vê une superioritât o une grande difusion statistiche, cuantitative o une presince significative (fig.)

esempi

"cualchi sorecognon al risultave necessari, tal piçul mont dai paîs di une volte, dulà che al dominave un cognon sôl (Marangone/i a Sante Marie)"

da "Fox trot" di Checo Tam

dominâ v.tr., v.intr.
(do-mi-nâ)

Stâ in posizion alte o prominente o impuartante (fig.)

sinonimi

sormontâ, stâ parsore, sorestâ, imponi

esempi

"in alt la lune plene e dominave la gnot"

da "Gjoldiments forescj" di Checo Tam

"la mont Ucka e dominave lis alturis cui siei crets taronts, alts tal cîl"

da "Int no consumade" di Agnul di Spere

dominâ v.tr.
(do-mi-nâ)

Controlâ cun sigurece (fig.)

sinonimi

gjestî, tignî in man, vê in man

esempi

"cui sio doi metros e cent chilos Christian al dominavo il suv, suv che al vevo a peno muardût un tornant che al puartavo su la strado par Valstuarto"

da "Geologicamente impossibile" di Fulvio ReddKaa Romanin

dominâ v.tr.
(do-mi-nâ)

Cognossi une vore ben

sinonimi

cognossi, savê

esempi

"il todesc al è fevelât tes varietâts locâls, in Valcjanâl al è ben dominât, sedi a nivel orâl che scrit, ancje il standard"

da "Notis di politiche linguistiche par un Friûl diferent" di Sandri Carrozzo

monolingue