SuperDizionari

dominâ v.tr., v.intr.
(do-mi-nâ)

Vê une autoritât superiôr, un podê assolût o une vore fuart suntun teritori, suntune comunitât e v.i.

sinonims

comandâ, paronâ, rezi, sorestâ

esemplis

"i Messens, che a jerin cuintri i Spartans che ju dominavin di secui"

gjavât fûr di "Viaç aes origjins dal Logos" di Adrian Cescje

"Antoni di Savorgnan che al dominave, sence sedi re, dut il Friûl, profitànt di chest malumôr, al metè sù il popul di Udin che [...] al fasè stragje dai nobii"

gjavât fûr di "Il Strolic furlan pal 1935" di Redazion SFF

dominâ v.tr., v.intr.
(do-mi-nâ)

Tignî cdn. in cundizion subordenade, spec. a nivel psicologjic

sinonims

comandâ

esemplis

"il concet di dominâ cualchidun al nas de pôre che chel cualchidun al à di pierdi ce che al à"

gjavât fûr di "Libertât: il misteri e la sfide" di Laurin Zuan Nardin

dominâ v.tr.
(do-mi-nâ)

Spec. di convinzions, sintiments, sensazions e sim., jessi cussi fuarts di controlâ une persone, di determinâ lis sôs sieltis, la sô cundizion psicologjiche e sim.

esemplis

"chel pôc che o savevi di sigûr al jere chest, che la vite e jere une mission, e che il sintiment dal dovê le dominave"

gjavât fûr di "Il dolfin" di Carlo Sgorlon

dominâ v.tr., v.intr.
(do-mi-nâ)

Vê une superioritât o une grande difusion statistiche, cuantitative o une presince significative (fig.)

esemplis

"cualchi sorecognon al risultave necessari, tal piçul mont dai paîs di une volte, dulà che al dominave un cognon sôl (Marangone/i a Sante Marie)"

gjavât fûr di "Fox trot" di Checo Tam

dominâ v.tr., v.intr.
(do-mi-nâ)

Stâ in posizion alte o prominente o impuartante (fig.)

sinonims

sormontâ, stâ parsore, sorestâ, imponi

esemplis

"in alt la lune plene e dominave la gnot"

gjavât fûr di "Gjoldiments forescj" di Checo Tam

"la mont Ucka e dominave lis alturis cui siei crets taronts, alts tal cîl"

gjavât fûr di "Int no consumade" di Agnul di Spere

dominâ v.tr.
(do-mi-nâ)

Controlâ cun sigurece (fig.)

sinonims

gjestî, tignî in man, vê in man

esemplis

"cui sio doi metros e cent chilos Christian al dominavo il suv, suv che al vevo a peno muardût un tornant che al puartavo su la strado par Valstuarto"

gjavât fûr di "Geologicamente impossibile" di Fulvio ReddKaa Romanin

dominâ v.tr.
(do-mi-nâ)

Cognossi une vore ben

sinonims

cognossi, savê

esemplis

"il todesc al è fevelât tes varietâts locâls, in Valcjanâl al è ben dominât, sedi a nivel orâl che scrit, ancje il standard"

gjavât fûr di "Notis di politiche linguistiche par un Friûl diferent" di Sandri Carrozzo

monolengâl