SuperDizionari

grandece s.f.
(gran-de-ce)

Complès des dimensions di un cuarp o di un ogjet

sinonimi

taie

esempi

""O vorès vê une ghirlande di rosis, par puartâle su la tombe de mê puore muîr [...]" "La ordenarai subit al stabiliment; di ce grandece la vuelial?""

da "A ogni cost" di Vittorio Vittorello

"une pile di scjatulis e scjatulons di ogni colôr e grandece"

da "Il tesaur di done Cheche" di Pieri Menis

grandece s.f.
(gran-de-ce)

Cualitât di cui e di ce che al à dimensions grandis o che al è grant te dimension de altece

sinonimi

altece

esempi

"la int si fermave a cjalâ chei soldadons che o jerin, che in chê volte i alpins a jerin ducj grancj. Ma plui de grandece e dal fusîl 91, a di chê int ur faseve colp l'alpistoc: cui sa a ce dal diaul che al siarvive chel ranganel li!"

da "La setemane rosse" di Pieri Menis

grandece s.f.
(gran-de-ce)

Cualitât di ce o di cui che al è impuartant, significant, influent, amirabil e v.i.

sinonimi

impuartance, significance, puartade

esempi

"a jê i interessave nome che a fossin jentrâts te storie de famee, e che jê e ves robis di contâmi de nestre grandece passade"

da "Il dolfin" di Carlo Sgorlon

"lei sù a Castagnavize / a visitâ il Convent. / Subit chei religjôs / cortês e gjenerôs, / mi mostrarin a dêt il monument / là che il mortâl impare / ce che sei la grandece su la tiare"

da "Çorut a Gurize" di Pieri Çorut

"il vescul di Salisburc Jaroni di Colorêt [...] nol capì la grandece di W.A. Mozart"

da "Colorêt" di Agnul di Spere

grandece s.f.
(gran-de-ce)

Nobiltât spirituâl

sinonimi

magnanimitât

esempi

"compagns di sventure, ma ancje di venture, di delusions, ma ancje di sperancis, di faliments ma ancje di realizazions straordenariis, di miserie morâl, ma ancje di grandece e santitât sflandorose"

da "Sant Jacum, là che al finìs il mont" di Antoni Beline

"il marcjât, nestre divinitât imperant, no dome al à violentade la bielece dal mont ma al à corot ce che di plui nobil al è: la grandece interiôr dal om"

da "Lôr nus condanin nô" di Tonin Cjapielâr

grandece s.f.
(gran-de-ce)

Ancje tal pl., maniere di fâ, di svantâsi, di spindi tant e v.i. che e mostre supierbie

esempi

"mi fasin di ridi a mi chês grandecis"

da "Mariute" di Ercole Carletti

monolingue