SuperDizionari

guviernâ v.tr.
(gu-vier-nâ)

Direzi un stât o une altre struture doprant il podê politic o aministratîf (ancje ass.)

sinonims

aministrâ, direzi, menâ, rezi

esemplis

"il lavôr e il dovê dal guvier al è chel di guviernâ e no chel di manovrâ in dut e pardut e simpri in viste des elezions che a vignaran dopo"

gjavât fûr di "Il guvier si picje di bessôl" di Riedo Pup

"o ai tocjât cun man la fuarce dal popul cuant che al guvierne. No esist la libertât fradi, ancje se iludin il popul di vêle"

gjavât fûr di "La cjase di Toni" di Tarcisio Venuti

Viôt ancje: governâ

guviernâ v.tr.
(gu-vier-nâ)

Di fuarce, leç e v.i., determinâ il davuelzisi di un ciert fenomen

esemplis

"svicinâsi a lis leçs [sientifichis] che a guviernin il nestri mont e a lis creazions dal inzen che a smicjin a fâ cressi il progrès de umanitât"

gjavât fûr di "Sclesis, cinc minûts di sience e tecnologjie" di Redazion RAI

guviernâ v.tr.
(gu-vier-nâ)

Stâ daûr di alc, o ancje di plantis e bestiis, o ancje di fruts e personis che a àn dibisugne, in mût di tignî in ordin, net, in funzion e v.i.

sinonims

regolâ, rezi

esemplis

"tal ort di cjase di gno pari o vevin cuatri cinc spaleris di vîts: merlot e merican. Lis guviernave Turo, un om che al passave plui oris in ostarie che tai vignâi"

gjavât fûr di "Il ricostituent pes vîts" di Lucia Scoziero

"al jere agnorums che la sô famee [di colonos] e guviernave chê tiere e a Matie no i jere nancje passât pal cjâf di cambiâ chê int"

gjavât fûr di "Sul agâr" di Pieri Menis

guviernâ v.tr.
(gu-vier-nâ)

Tignî il control di une barcje o di une nâf

esemplis

"malpratics di guviarnâ una barcja fûr del canâl e cun un timp come chel, vevin cedût a lis ondis e al vint"

gjavât fûr di "Il me paîs" di Federigo Comelli

guviernâ v.tr.
(gu-vier-nâ)

Taiâ i testicui di un animâl in mût che al deventi plui gras e mugnestri (eufem.)

sinonims

spadâ, cjastrâ

monolengâl