SuperDizionari

interessâ v.intr., v.tr.
(in-te-re-ssâ)

Jessi calcolât impuartant, bon di stiçâ la curiositât, di jessi cjapât in considerazion e v.i.

sinonimi

impuartâ, freâ

esempi

"lui al à capît che a mi no mi interessave il so parê"

da "Trê feminis" di Gianni Gregoricchio

"ce che a fasin chei altris no mi interesse propit nuie"

da "I forescj" di Alan Brusini, Gian Paolo Linda

"zirant pal mont, cuant che alc lu interessave, une riviste, un articul di gjornâl, un libri, un ricuart, un grabatul, magari une robe di nuie, le impachetave e la mandave par pueste a cjase"

da "Sul agâr" di Pieri Menis

interessâ v.intr., v.tr.
(in-te-re-ssâ)

Jessi afâr di cdn., rivuardâ

sinonimi

impuartâ, tocjâ

esempi

"o ai ce che o ai, e a voaltris no us interesse"

da "I colaçs" di Meni Ucel

"cualunche iniziative che e interessi il public e un grum di chês privadis, prime di lâ in vore a scuegnin passâ sù par chei scjalins"

da "Jerarchie" di Josef Marchet

interessâ v.tr.
(in-te-re-ssâ)

Fâ in maniere che cdn. al pensi che alc al sedi impuartant, che al vedi curiositât di savê di plui e plasê tal partecipâ

sinonimi

sburtâ, stiçâ, tirâ, tirâ dongje, svicinâ, sdongjâ

esempi

"co cualchi cultôr al cîr di interessâ la int al furlan, al sint dispès a rispuindi: "A ce pro?""

da "Il Friûl di Lelo Cjanton" di Eddi Bortolussi

interessâ v.tr.
(in-te-re-ssâ)

Sburtâ a intervignî ancje a pro di cdn.

sinonimi

informâ

esempi

"cu la sô scaltrece, e veve pensât di fâsi volê ben di cualchi famee in grant e li, di fâsi fâ dûl di cualchidun e po di interessâlu ae robe"

da "Mabile la Lunghine" di Maria Forte

interessâ v.tr.
(in-te-re-ssâ)

Vê efiet su cdn. o alc

sinonimi

cjapâ dentri, competi, implicâ, riferî, rivuardâ, tocjâ

esempi

"là nol jere nuie che al podès interessâ il tacuin"

da "Il sium di Lissandri" di Franca Mainardis

"une inchieste che e à interessât bocon par bocon dute la Italie"

da "Delincuents si devente" di Riedo Pup

monolingue