SuperDizionari

intonazion s.f.
(in-to-na-zi-on)

[CO] (mus.) L'intonâ, l'intonâsi e il lôr risultât, soredut di un strument musicâl o di plui struments musicâi o di plui vôs corâls tra di lôr

esempi

"o voi petant cun lui cualchi cjantade / e cuant che vin cjatât la intonazion, / lui di Tebaldo al fâs, jo di Isoline"

da "Il mio cjan" di Pieri Çorut

intonazion s.f.
(in-to-na-zi-on)

(ling.) Modulazion des altecis tonâls intal produsi i suns di une lenghe

esempi

"la notazion prosodiche si interesse de marcadure de prosodie dal test fevelât cun tant di acent, intonazion, pausis e v.i."

da "Corpus linguistics" di Vladimir Petkevic

"il talian invezit [par formâ lis domandis] nol dopre la sintassi ma dome une intonazion divierse"

da "Se tu sâs il furlan tu imparis l’inglês!" di Franco Finco

intonazion s.f.
(in-to-na-zi-on)

Maniere di fevelâ che e pant une cierte espression

esempi

""Ce fasino po?" al sberlà cualchidun suntun cjar di mieç; e al slungjà fûr il cuel a cucâ. Co al lupà la frascje, al saltà jù, mudade intonazion: "Ah, al è ce bevi!""

da "La aghe da pît la cleve" di Dino Virgili

"il contignût des peraulis al podeve someâ stiçât, ma no si olmave nissune uce inte intonazion de sô vôs"

da "Altris contis di famee" di Raffaele Serafini

intonazion s.f.
(in-to-na-zi-on)

Caratar di un scrit, di un discors e v.i. (fig.)

sinonimi

ande

esempi

"dutis canzonetis lizeris o periculosis, parcè che dutis di intonazion amorose o erotiche o sensuâl"

da "La fabriche dai predis" di Antoni Beline

intonazion s.f.
(in-to-na-zi-on)

Variazion di colôr (fig.)

sinonimi

tonalitât, gradazion, ton, at

esempi

"ros e vert. turchin e viole / in milante gradazions; / ogni femine, ogni fiole / à trê cuatri intonazions"

da "Vivi e lassâ vivi" di Fonso Deperis

"une raiade di soreli e rive a foropâ il nûl di borascje, fasint slusî tal lôr vert svareât di mil intonazions lis monts"

da "Vitis in Cjargne e misteris tal cûr" di Renzo Balzan

intonazion s.f.
(in-to-na-zi-on)

Maniere di cumbinâsi di plui elements tra di lôr (fig.)

sinonimi

armonie, cumbinazion

esempi

"Luisa e sunave: lis spalis e i riçots bionts jù pe schene, i braçs crots, dut il so cuarpesel scarmulin a jerin tune intonazion perfete cul saltuçâ de musiche"

da "La aghe da pît la cleve" di Dino Virgili

monolingue