SuperDizionari

maledet adi., s.m.
(ma-le-det)

Che, cui che al è ogjet di une maledizion, che i si brame une punizion divine o sorenaturâl o une disgracie

esempi

"su las puartas di Glemona / I ai viodût il mio amôr / maledet chel che a lu roba / maledet l'imperadôr"

da "Maledet l'imperadôr" di Popolâr

maledet adi., s.m.
(ma-le-det)

Che, cui che al è trist, traditôr e sim. e che al merete la condane divine, ancje tant che ofese gjeneriche

sinonimi

anime discuside, anime nere, danât, disgraciât, infam, malandret, sacraboltât, sborât, sfonderât, sfondrât, stramaledet, osteât, sacramentât

esempi

"il paron di cjase Rusin al salte fûr dal porton porconant e businant plen di madonis cuintri chei bastarts, maledets, galeris, manigolts che se us cjapi!"

da "Impresis" di Laurin Zuan Nardin

maledet adi., s.m.
(ma-le-det)

Di alc, che al fâs dam o che si calcole negatîf, ancje tant che espression gjeneriche di rabie (ancje iperb.)

sinonimi

danât, disgraciât, infam, malandret, sacraboltât, sborât, sfonderât, sfondrât, stramaledet, osteât, sacramentât

esempi

"dentri [te letare] e jere scrite la fin dal puar soldât. In chê volte e si sintì a gotâ sul cûr dut il sanc de la vuere maledete"

da "Il cjan blanc di Alturis" di Catarine Percude

"si cjapavin malatiis tant che polmonite, pleurite, bronchite e la maledete “durchfalle”, la dissentarie"

da "Buchenwald 1944" di Max Mauro

"chel maledet di un timp nol vûl metisi a bon"

da "Resurezion a Pontinie" di Pieri Somede dai Marcs

maledet adi., s.m.
(ma-le-det)

In paragons e espressions enfatichis, par dâ un valôr di superlatîf, di alc di estrem, esagjerât (fig.)

sinonimi

malandret, danât, sacraboltât, osteât

esempi

"al mangje come un maledet"

da "Contis sot spirt" di Raffaele Serafini

"dispès al sintive tal cerviel une confusion maledete"

da "Ombris tal infinît" di Carlo Sgorlon

maledet adi., s.m.
(ma-le-det)

[TS] (let.) Ancje cun iniz. maiusc., che, cui che al faseve part dal grup di poetis francês decadents definît di Paul Verlain dai poètes maudits, o plui in gjenerâl artist cuntun talent straordenari ma no ricognossût de sô societât, che si compuarte in maniere distrutive e autodistrutive

esempi

"al leieve Baudelaire, Rimbaud e ducj i Maledets"

da "Don Franziskus e Iskander" di Checo Tam

monolingue