SuperDizionari

pierdisi v.pron.intr.
(pier-di-si)

No savê plui là che si è e no cjatâ la strade

esempi

"si scugnive passâ il bosc di Kebespok, une pinede fisse fisse, dulà che nancje di dì nol jentrave il soreli, e il passaç al jere cussì stret che no si stave in trê a pâr. Cualchidun al à visât di stâ atents par no pierdisi…"

da "Tal bosc di Kebespok" di Pieri Menis

"cuant che al veve cjapade la scurtadorie par rivâ a cjase plui spedît, sedi distrazion, sedi strachetât, sedi destin, no si pierdial lui, che nol saveve di ce bande lâ"

da "La fogolade dal bosc" di Josef Cjargnel

pierdisi v.pron.intr.
(pier-di-si)

No rivâ a stâ plui daûr di alc cul pinsîr, cu la atenzion (fig.)

sinonimi

confondisi, confusionâsi, gredeâsi, imbroiâsi, ingredeâsi, sbarlufîsi, sconfondisi, straviâsi

esempi

"emisferi di diestre, emisferi di çampe, man çampe, man diestre; dal sigûr cualchidun si à pierdût tal mieç di chestis peraulis"

da "Il cjâf dai furlans" di Franc Fari

pierdisi v.pron.intr.
(pier-di-si)

Straçâ timp o fuarcis in robis che no coventin o in masse robis cence otignî risultât (fig.)

esempi

"plui che pierdisi in cjacaris e in çavariaments, o varessin di jessi contents"

da "‘Blecs’, ‘Tacons’ e altris supostis" di Marc Stolf

""Jo no sai parcè che mi piert a discori cuntun manoâl ignorant!""

da "Cretevierte" di Roberto Ongaro

pierdisi v.pron.intr.
(pier-di-si)

Passâ il timp in alc che si fâs par gust, no par lavôr (fig.)

esempi

"jo mi pierdevi a zuiâ cui gjats che si platavin tal toglât tal mieç dal stranc"

da "Al cricave il dì" di Isa Dorigo

pierdisi v.pron.intr.
(pier-di-si)

Dâ impuartance, ancje puntiliose e rabiose, a alc che no le merete (fig.)

esempi

"intant, ancje fra di lôr, lis feminis si pierdevin tor rimpins di nuie"

da "Cjase di Dalban" di Maria Forte

pierdisi v.pron.intr.
(pier-di-si)

Lâ al mancul fin a cessâ di esisti (fig.)

sinonimi

discjolisi, disfantâsi, disfumâsi, dislidisi, disparî, dissipâsi, distudâsi, disvinidrîsi, estinguisi, finî, murî, sfantâsi, smamîsi, sparî, studâsi, svampî

esempi

"la vôs di un frut che al veve sberlât «la nêf, la nêf», come se al ves viodût un miracul, si è pierdude tal aiar fer"

da "Il miracul dal plevan di Trep" di Pieri Menis

"se il Friûl al larà piardintsi come popul e come nazion parcè che si lassin smenteâ e distudâ i siei valôrs di culture, di storie, di lenghe, di tradizions, si savarà, almancul, a cui dâ la colpe"

da "I furlans e la partecipazion" di Riedo Pup

pierdisi v.pron.intr.
(pier-di-si)

No risaltâ, no fâ spic (fig.)

sinonimi

discomparî, dispierdisi, disparî, sparî

esempi

"e je une grande robe pal nestri popul. No sin plui un fasûl messedât intune cite che si piert cun ducj chei altris. A san che o vin une muse"

da "In non di Diu scomençait!" di Francesc Placerean

"lis iniziativis di cheste sorte, cundut de cualitât che a puedin vê vût, si son pierdudis te grande confusion mediatiche dal mont di vuê cence vê l'efiet sociâl che si sperave"

da "Efiets economics e ocupazionâi des leçs di tutele de lenghe furlane" di Sandri Carrozzo, Linda Picco

pierdisi v.pron.intr.
(pier-di-si)

Ruvinâsi dal pont di viste morâl o finî intune cundizion di disgracie (fig.)

esempi

"cul riscjo, (chest al è un riscjo) che i zovins si slontanin masse dai gjenitôrs e cussì plui facilmentri a si pierdin"

da "Cemût tirâ su i fîs in cheste ete" di Francesc Placerean

pierdisi v.pron.intr.
(pier-di-si)

Lassâsi cjapâ a plen di une sensazion, di une situazion, di une passion e v.i., cence vê plui paronance di se stes (fig.)

esempi

"le imbraçai a fuart e jê e faseve chel istès, intant che mi strissinave te cjamare. Jo mi pierdei in jê come dentri une largjure di mâr"

da "Il dolfin" di Carlo Sgorlon

""[...] vuelial che une signorine come Clare si piardi tor un puar batocjo come Gelindo?""

da "Co l'amôr al cimie" di Costantino Smaniotto

pierdisi v.pron.intr.
(pier-di-si)

No vê plui presince di spirt, fuarce di reazion, fuarce morâl, fiducie (fig.)

sinonimi

sbarlufîsi, scaturîsi, sconciertâsi, spaurîsi, conturbâsi, dismedolâsi

esempi

"a pre Zaneto i tocjà, tai agns Trente, par vie des leçs fassistis che a improibivin di doprâ i dialets, di no podê scrivi par tancj agns poesiis te sô lenghe mari, ma no si pierdè par chest, anzit"

da "Emigrants a pro dai zovins" di Erika Adami

pierdisi v.pron.intr.
(pier-di-si)

Vignî pierdût, no rivâ a destinazion

esempi

"la pueste e rivave regolarmentri, ancje se il nemì al intercetave dispès lis nâfs o i avions talians; alc si pierdeve ma i soldâts a jemplavin di continui chei fueuts celescj tant impuartants"

da "La vuere di Checo" di Checo Tam

pierdisi v.pron.intr.
(pier-di-si)

No stâ plui tal so puest, dismontâsi, colâ

sinonimi

distacâsi, dismontâsi, gjavâsi, colâ, disbletâsi

esempi

"une dì si discerclà une ruede, si piarderin un cuatri rais e un doi gjaveis, e alore [il cjaruç] al restà fer tun cjanton da la arie"

da "Il cjaruç dai Bas" di Dino Virgili

pierdisi v.pron.intr.
(pier-di-si)

Cun sens di reciprocitât, no jessi plui in relazion, in confidence, in amicizie

esempi

"si vevin fatis amiis jê e Taresie e no si vevin pierdudis nancje dopo che Mafalde e jere lade a stâ a Lauçane"

da "Trê feminis" di Gianni Gregoricchio

pierdisi v.pron.tr.
(pier-di-si)

No viodi, no sintî, no gjoldi di alc, no cjapâ une ocasion e v.i.

sinonimi

mancjâ

esempi

"se jo o fos siore e no maridade, o Signôr benedet, no mi pierdarès nancje un teatri, nancje un film a pene vignût fûr intes salis, o sarès inte prime file"

da "Fade o strie" di Barbara Battel

"jê si pierdeve dut il spetacul de nature par stâ intune preson plene di comoditâts"

da "L'arbul vieli" di Davide Peressoni

"no mi soi pierdût la ocasion di incuintrâlu par fâ cuatri cjacaris cun lui"

da "David Puente, il cjaçadôr di ‘fake news’: «Fâur cuintri al è un dovê civîl»" di Dree Venier

monolingue