SuperDizionari

torne indaûr

monolengâl

prese s.f.
(pre-se)

Cuantitât di alc cjapade cu lis pontis dai dêts

sinonims

piçade, ponte, piç

esemplis

"al veve metût tal sachetin de gjachete une prese di vanilie par nasâ bon"

gjavât fûr di "La ombrene" di Meni Ucel

"e cjapà sù dal platut di leton une prese di cinise e le poià, sfreolantle, sul cerneli de Vire, sul ôr dai cjavei"

gjavât fûr di "La cinise" di Meni Ucel

prese s.f.
(pre-se)

Cuantitât minime, ancje di alc di imateriâl (fig.)

sinonims

fîl, fregul, fruçon, ombre, pêl, piç, ponte, rascje, sclip, tic, ninin, tininin

esemplis

"un fregul di coragjo e une prese di fantasie"

gjavât fûr di "Tal grim de fede e de storie" di Antoni Beline

prese s.f.
(pre-se)

Il cjapâ, il trignî strent e il so risultât

esemplis

"o restavi ingrampât al gno puest procurant di no pierdi la prese"

gjavât fûr di "Ricuarts e inlusions" di Enrico Martina

prese s.f.
(pre-se)

Il vê incisivitât, fuarce, efiet (fig.)

esemplis

"i mucs a jerin aromai cence prese"

gjavât fûr di "Cjase di Dalban" di Maria Forte

prese s.f.
(pre-se)

Ce che al ven cjapât e cuantitât di ce che al ven cjapât, soredut te cjace

esemplis

"vuê si à fat une buine prese"

gjavât fûr di "Il Nuovo Pirona" di Giulio Andrea Pirona, Ercole Carletti, Giovanni Battista Corgnali

prese s.f.
(pre-se)

[TS] (sport) Te scjalade, toc di cret che si pues cjapâ cui dêts o li che si puedin pontâ i pîts

esemplis

"al môf la man a palpon, al cjate une buine prese, si tire sù. Rimpinâ al è come balâ cu la montagne e cirî a ogni pas di lâ daûr de sô musiche"

gjavât fûr di "Faliscjis" di Cristina Noacco

prese s.f.
(pre-se)

[TS] (sport) Mosse te lote di plui gjenars par blocâ l'aversari

prese s.f.
(pre-se)

Il deventâ dûr di un materiâl e il mantignî la adesion

esemplis

"doi trê dîs, e il ciment al fâs prese, si indurìs"

gjavât fûr di "La aghe da pît la cleve" di Dino Virgili

"zes di prese"

prese s.f.
(pre-se)

Tai zûcs, il cjapâ lis cjartis, lis pedinis o i tocs dal aversari

sinonims

pie, piade

prese s.f.
(pre-se)

Dispositîf che si pues regolâ pe jessude di fluits

esemplis

"la prese dal gas"

prese s.f.
(pre-se)

[TS] (eletr.) Dispositîf li che si tache la spine par cjapâ la corint di une rêt di distribuzion

esemplis

"une volte colegât a la prese di corint di colp l'aparât al veve tacât a sgrasaiâ… ondis AM… vôs lontanis… ondis FM… cjançons di musiche pop"

gjavât fûr di "I nemîs" di Checo Tam

prese s.f.
(pre-se)

[TS] (idraul.) Costruzion par derivâ aghe intun canâl o intun cicrcuit artificiâl

esemplis

"e ven fate sù ancje un prin toc de roste sul Tiliment par parâsi des plenis e pôc dopo la prese de roie un pôc plui disore di dulà che cumò al è Ospedâl Piçul"

gjavât fûr di "Studi da la evoluzion dal paisaç mediant i toponims" di Rino Gubiani

"il tsunami al à distrut i implants di prese de aghe dal mâr che a alimentavin i sistemis di disfredament [de centrâl nucleâr]"

gjavât fûr di "Il disastri de centrâl nucleâr di Fukushima Dai-ichi" di Alessandro Pascolini

detulis

"daspò cene une prese di tabac e fâs la plene"

"daspò mangjât e bevût, une prese di tabac e ten passût"

"daspò mangjât e bevût, une prese e ten passût"

torne sù