SuperDizionari

program s.m.
(pro-gram)

Scheme di ce che si vûl o ce che si à di fâ, dal procedi e de direzion di lâi daûr, dai obietîfs e dai mieçs che si intint di doprâ par rivâ a un obietîf, tant a nivel individuâl, che aziendâl, nazionâl e v.i.

esemplis

"chest program enunziât dal professôr Renzi al è propit chel che o vin adotât in chest lavôr: aplicazion dal principi de grafie unitarie e des regulis di pronunzie diferentis, adozion de grafie de Societât Filologjiche Furlane come pont di partence [...] e adozion de coinè tradizionâl come varietât di riferiment"

gjavât fûr di "La grafie furlane normalizade – Introduzion" di Xavier Lamuela

"Wernher von Braun, o ben il pari de missilistiche e un dai fondadôrs dal program spaziâl american"

gjavât fûr di "Associazion dal Centri Radio Astronomic de Mont di Muris di Ruvigne" di Gloria Angeli

program s.m.
(pro-gram)

Idee, progjet di realizâ

sinonims

dissen, plan, progjet, proposizion, propueste

esemplis

"al stave par lâ in feriis e no se spietave che un muart i vignìs a butâ pal aiar i programs di setemanis di sflacje sportive a pescjâ in Jugoslavie"

gjavât fûr di "Ah! la provincie" di Sandri Di Suald

program s.m.
(pro-gram)

Complès di ativitâts che a van daûr di ce che al jere previodût

esemplis

"la visite de glesie fo la plui biele part dal program"

gjavât fûr di "La Madalene" di Zuan Lurinçon

program s.m.
(pro-gram)

Liste di rapresentazions, spetacui, garis o altris manifestazions publichis previodudis intun ciert timp, intune stagjon o intune serie di incuintris

sinonims

agjende, cartelon

esemplis

"dut il program dal festival al è stât cambiât e no si sa cui che al sune"

gjavât fûr di "La maree nere" di Checo Tam

program s.m.
(pro-gram)

Trasmission televisive o radiofoniche

esemplis

"diviers programs radiofonics si puedin scoltâ ancje in streaming e in podcast"

gjavât fûr di "La lenghe furlane tai mieçs di comunicazion" di Erika Adami

program s.m.
(pro-gram)

[TS] (scol.) Plan de ativitât didatiche che un insegnant o lis autoritâts scolastichis a decidin di davuelzi intun o plui cors seguitîfs di un ciert ordin di scuele

esemplis

"si cjate dut pront: locâi, libris, programs. La scuele e je une vore ordenade"

gjavât fûr di "I furlans e il mestri" di Riedo Pup

"i programs de Istruzion Publiche a tindevin a dislidrisâ de scuele lis influencis dai dialets"

gjavât fûr di "Il furlan tes scuelis e te universitât" di Odorico Serena

program s.m.
(pro-gram)

[TS] (polit.) Complès dai criteris e dai obietîfs che su chel si fonde la azion di un partît o di un guvier

esemplis

"i eletôrs a puedin restâ indiferents a programs politics che a tindin a rinfuarcî l'autoguvier o lis cundizions socioeconomichis dal teritori, ma a àn lis orelis ben spiçadis rivuart a programs politics che a vuelin comprimi e peiorâ chês cundizions"

gjavât fûr di "Il risultât eletorâl dai partîts di identitât teritoriâl - A case study: Scottish National Party" di Sergio Cecotti

program s.m.
(pro-gram)

Spec. inte sfere religjose, artistiche, leterarie e sim., formulazion di criteris, opinions e obietîfs di nature divierse, fate come presentazion o propagande di une corint, di un grup e v.i.

sinonims

manifest

esemplis

"[il grup artistic furlan dal prin Nûfcent] al jere tignût adun plui che di programs declarâts, di resons di afinitâts inteletuâls"

gjavât fûr di "Storie de art in Friûl" di Bepi Agostinis

program s.m.
(pro-gram)

[TS] (inform.) Secuence di istruzions scritis intun lengaç di programazion

esemplis

"intal 2008 e soredut intal 2009 a son stadis puartadis insom dutis lis operazions par rivâ al program “Jude3”. Al è un vêr tradutôr a trasferiment "

gjavât fûr di "Jude - Traduzion automatiche dal talian al furlan" di Sandri Carrozzo, Franz Feregot

program s.m.
(pro-gram)

[TS] (tecn.) Intai eletrodomestics cul cicli automatic, secuence di operazions

esemplis

"selezionâ il program de machine di lavâ"

monolengâl