SuperDizionari

pûr adi.

Che si presente intal so stât naturâl, cence alterazions, o che al è rafinât in maniere di no jessi misturât o contaminât

sinonims

rût, rampit

esemplis

"un milion e mieç di oncis di aur pûr, vendudis par 30 milions di dolars"

gjavât fûr di "La emigrazion dal Friûl - Vignesie Julie in Canadà" di Javier Grossutti

"la lampadine e vignive scjaldade a alte temperadure par fâ svaporâ il supuart e otignî il prodot finâl, ven a stâi grafite purissime"

gjavât fûr di "La invenzion dal vueit inte lampadine di Turo Malignani. Storie, gnovis ipotesis e atualitât" di Lorenzo Marcolini

pûr adi.

Che al è net, che nol à sostancis che a fasin mâl

sinonims

crei, cristalin, incontaminât, mont, net, pulît, rampit, rût, vergjin, limpi

esemplis

"vivi intun paîs di montagne là che la arie e je plui fine e pure"

gjavât fûr di "Cretevierte" di Roberto Ongaro

"al veve fat rivâ jù la aghe plui pure che e sgornàs des monts"

gjavât fûr di "Cjase di Dalban" di Maria Forte

pûr adi.

Par esprimi limitazion, esclusivitât

sinonims

sôl, rût

esemplis

"soluzions che no jerin di pure grafie, che no cjalavin dome al aspiet fonetic de cuistion, ma a jerin veris e propriis sieltis di formis morfologjichis"

gjavât fûr di "Memoriis di politiche linguistiche" di Adrian Cescje

"ogni riferiment a fats reâi al è dal dut casuâl e che i nons, ancje chei che no ai fat, a son di pure fantasie"

gjavât fûr di "L'om che al pierdeve pinsîrs pe strade" di Fabian Ros

pûr adi.

Di individui o raze animâl o vegjetâl, che nol diven di incrosaments cun razis diviersis

sinonims

sclet, arût, rampit, rût

esemplis

"il miscliçament des razis al fo plui o mancul fuart su la planure; ma sui cuei e massime tes monts la çocje celtiche e restà dibot pure fintremai ai nestris timps"

gjavât fûr di "Cuintristorie dal Friûl fin sot la Italie" di Josef Marchet

pûr adi.

Dal lengaç, che al à intat il so caratar origjinari, che nol è influençât di altris idiomis

sinonims

bon, clâr, net, rût, sclet

esemplis

"procurâ di doprâ une lenghe pulide e, si podarès dî, “pure”"

gjavât fûr di "Modei di lenghe scrite e imprescj linguistics" di Sandri Carrozzo

pûr adi.

Di une sience, di un studi, che al trate i contignûts cun criteris teorics, lassant fûr cualsisei aplicazion pratiche

esemplis

"i sengui tiermins de teorie [...] a saran presentâts tant che principis de fisiche pure"

gjavât fûr di "Teologjie algjebriche" di Sergio Cecotti

pûr adi., s.m.

Che, cui che nol è contaminât dal pecjât, cence vizis, colpis, difiets dal pont di viste morâl e religjôs (fig.)

sinonims

cast, imaculât, mont, net

esemplis

"riferiment clâr ae arcje di Noè, li che a jentrin siet cubiis di animâi pûrs e une cubie di animâi impûrs"

gjavât fûr di "I mosaics de basiliche di Aquilee" di Giovanni Battauz, Flavio Cossar, Renato Iacumin

"Bepi nol varès mai dit chestis robis! Al jere un pûr!"

gjavât fûr di "La foghere" di Luciano Rocco

monolengâl