SuperDizionari

ribalton s.m.
(ri-bal-ton)

Moviment imburît che al ribalte, che al cambie dal dut di posizion, ancje colant o fasint colâ

sinonimi

volton, ribaltament, messedament

esempi

"a un tiarç i ven la voie di lâ in balon / e sul plui biel al fâs un ribalton: / in pratiche cussì i devente clare / la teorie di atrazion da tiare"

da "Cormons" di Fonso Deperis

Vedi anche: rebalton, rabalton

ribalton s.m.
(ri-bal-ton)

Mudament di situazion, soredut in riferiment ae politiche o ae societât (fig.)

sinonimi

savoltament, disledrosament, rivoltament, sledrosament, messedament, voltament

esempi

"al jere sucedût un ribalton che al veve butât par aiar dut ce che al jere stât insegnât e fat sperâ par vincj agn di fassisim"

da "Cuintristorie dal Friûl dal 1866 fint in dì di vuê" di Francesc Placerean

ribalton s.m.
(ri-bal-ton)

Grande confusion (fig.)

sinonimi

badaluc, balfuerie, barafuse, batibui, bordel, caos, casin, cine, circ, conturbie, daidai, davoi, disio, fracassine, mismàs, pastiel, pestefruce, savoltament, sdavassum, tananai, montafin, confusie

esempi

"di ca e di là de strade dute sot sore, si viodeve nome un ribalton di bicicletis, di armis e di elmets, carognis di cjavai e di mûi"

da "Sul agâr" di Pieri Menis

"meteit a puest dut cuant ca dentri che al è dut in ribalton"

da "Co l'amôr al cimie" di Costantino Smaniotto

ribalton s.m.
(ri-bal-ton)

Manifestazion atmosferiche cun aiar fuart, precipitazions, che e pues ancje fâ dams

sinonimi

ribaltament, temporâl, montafin, bovadice, codebuie, burlaç, savoltament

esempi

"l’aier, la bovadice e la brentane / sdrumin la mont da la piche al fondon: / e se pai crets il temporâl si acane / jù pal cjanâl al nas il ribalton"

da "Sù pa la Aupe" di Enrico Fruch

monolingue