Hai cercato la parola
monolingue
Torna indietro

monolingue

rompi v.tr.
(rom-pi)
Fâ che alc al pierdi la sô integritât o si dividi in plui tocs cu la fuarce, cuntun colp, colant e v.i.
sinonimi
crevâ, çoncjâ, disjustâ, dissipâ, disvuessâ, fracassâ, fruçâ, scjavaçâ, scuancassâ, sfonderâ, sglovâ, spacâ, stornâ, svegrâ
esempi
"cjoli fûr de cassele dai lens chei doi stecs che a coventin [par fâ fûc]; e rompiju"
da "La Gjis" di Meni Ucel
"fantats cjocs e drogâts [...] a tiravin claps in puartis e vetrinis rompint dutis lis lastris"
da "Par stradis lungjis" di Alan Brusini
rompi v.tr.
(rom-pi)
Causâ o patî une frature
sinonimi
crevâ
esempi
"cul colâ malamentri e veve rote une gjambe"
da "Il testament" di Pieri Menis
rompi v.tr.
(rom-pi)
Fâ in mût che alc si sbusi, si sbreghi, e v.i.
sinonimi
crevâ, slambrâ, sbregâ
esempi
"il so cjan al ven regolarmentri a spergotâ pissin sui zeis. Vuê, mi à ancje rot i bregons e muardude la polpete"
da "I dincj" di Angelo Covazzi
rompi v.tr.
(rom-pi)
Fâ in mût che alc nol funzioni plui
sinonimi
disjustâ, vuastâ
esempi
"a lu rompês savêso [il gramofon]; lassaitlu stâ, nol è nestri"
da "Co l'amôr al cimie" di Costantino Smaniotto
rompi v.tr.
(rom-pi)
Fâ che alc al pierdi continuitât, che nol sucedi plui (ancje fig.)
sinonimi
fermâ, interompi, crevâ
esempi
"i imperadôrs a protestarin e si sfuarçarin di rompi cheste cjadene vergognose di usurpazions fatis tal interès de republiche e in barbe aes leçs dal Concili"
da "Cuintristorie dal Friûl fin sot la Italie" di Josef Marchet
rompi v.tr., v.intr.
(rom-pi)
Lâ cuintri di alc, no rispietâlu
esempi
"a son rivâts adore di strissinâ il plevan a rompi la regule e vignî a sposâju intune filiâl"
da "Lis predicjis dal muini" di Josef Marchet
"no tu varessis vût il cûr di rompi cu lis tradizions"
da "Ricuarts e inlusions" di Enrico Martina
"dispreseâ, tradî, rompi i leams cul popul e cu la tiere al è condanâsi a une muart culturâl e spirituâl sigure"
da "La eterne lote dai furlans" di Antoni Beline
rompi v.tr., v.intr.
(rom-pi)
No mantignî plui un leam, une relazion, un impegn (fig.)
esempi
"o vin cjatât un altri talian che ancje lui, come nô, al veve decidût di rompi il contrat che o vevin fat cul guvier [canadês] e al jere lât a cjatâsi un lavôr di bessôl"
da "Une storie corint" di Igino Macasso
"rompi cu la morose"
rompi v.tr.
(rom-pi)
Dâ fastidi (ass.)
esempi
""tai stalons di Padue" lui nol voleve plui tornâ, che no jerin, chei, timps di straçâ sui libris e siore Rose, sô mari, lu capive e no i rompeve sore"
da "Cjase di Dalban" di Maria Forte
rompi v.tr.
(rom-pi)
Mudâ une situazion in mût di fâ sparî une cierte cundizion (fig.)
sinonimi
crevâ, çoncjâ
esempi
"la gnot si cjamave di armis che a rompevin la pâs des culinis"
da "Cjase di Dalban" di Maria Forte
"juste la aghe che si disgotave dai cops te cunete e rompeve chel zito, e la buere, a bugadis"
da "La ombrene" di Meni Ucel
"dome cualchi lusorut di barcon a rompi il scûr"
da "La tiere di Lansing" di Maria Forte
rompi v.tr.
(rom-pi)
Paiâ cuntune monede o cjarte monede di valôr plui alt dal presit, in mût di vê di rest monedis o cjartis di tai plui piçul
sinonimi
disniçâ
esempi
"si vise che al è cence tabac. Al cîr se al à di minûts te sachete, e no 'nt cjate [...] Alore al dîs: «O romp cheste», gjavant di un tacuin [...] une cjarte di «chês»"
da "La vacje" di Meni Ucel
rompi v.tr.
(rom-pi)
[TS] (agr.) Arâ insot la tiere (ancje ass.)
sinonimi
svegrâ
esempi
"Zuan si jevâ di buine uce e al invidà la Ulive a fâ un zîr te lôr campagne. A rivarin fin là sù dai Falons che a jerin daûr a rompi un toc di prât"
da "La tiere di Lansing" di Maria Forte
"la sô int e jere tornade di vore: chei oms, di rompi tal Pradat; chês frutatis, di fâ fassuts te Cudite"
da "Agne Ursule" di Pieri Menis
rompi v.intr.
(rom-pi)
Di precipitazion atmosferiche, tacâ a vignî jù, spec. in maniere imburide e violente
esempi
"il sun distant e distirât di cualchi cjampana che al preiava la grazia di Dio framieç al temporâl che infuriava. Scomençà a rompi la ploia: un diluvi"
da "Il me paîs" di Federigo Comelli
rompi v.intr.
(rom-pi)
Cressi une vore svelt, a la improvise
sinonimi
fâ une rote
esempi
"«Ce aial di vê mo, chel frut… nome piel e vues che nol met dongje nuie?» Sui siet agns finalmentri chel biadin al à rot, al scomençà a cjapâ fuarce, po a colorîsi, a slungjâsi come un pivot"
da "Une cotule pal dì de sagre" di Pieri Menis
proverbi
"a cui che al file ben, rompii lis gjambis; a cui che al file mâl, rompii i braçs"
"a fâ il pas plui lunc de gjambe, si romp il cavalot"
"a stâ dibant no si romp i vues"
"bisugne pleâ la bachete, l'arbul si romp"
"bisugne rompi i ûfs se si vûl fâ la fertaie"
"cu la umiltât si romp la glace"
"cui che al romp che al pai"
"cui che al romp di vieri al paie di gnûf"
"cui che le à rote prin che al pai il cjalçumit"
"cul cerçâ no si romp il dizun"
"il pan di servî al à siet crostis e bisugne rompi i dincj par mangjâlu"
"il pericul al romp il fier"
"il timp e la muart a rompin i dissens"
"la lenghe no à vues ma ju fâs rompi"
"la necessitât e romp il fier"
"necessitât romp leç"
"no stâ lassâti rompi lis coculis sul cjâf"
"o lâ o rompi"
"ogni trop al romp il grop"
"pat romp leç"
Torna in Cima