SuperDizionari

rumiâ v.tr.
(ru-mi-â)

Di bestiis tant che la vacje, il bufal, il bisont e v.i., tornâ a mastiâ la jerbe che e jere stade glotude tal rumi (ancje ass.)

esemplis

"si sintivin lis vacjis a rumiâ e a svintulâ il scovet de code sul stran par parâ vie lis moscjis"

gjavât fûr di "Gnot clare gnot scure" di Pieri Somede dai Marcs

"cui lavôrs distrighiti tu, e da un cuc a di chê bestie là te stale, se e rumie"

gjavât fûr di "La massarie" di Dino Virgili

rumiâ v.tr.
(ru-mi-â)

Di cdn., mastiâ a di lunc (ancje ass.)

esemplis

"di sere si sentavin sul pat, cu la schene cuintri il mûr a cjalâ ducj chei che a passavin, rumiant favis brustuladis"

gjavât fûr di "La aghe da pît la cleve" di Dino Virgili

rumiâ v.tr.
(ru-mi-â)

Pensâ e tornâ a pensâ parsore (fig.)

sinonims

filâ, batile, discervielâsi, lambicâsi, mastiâ, mastiâle, mateâ, meditâ, mulinâ, striçâ, tramaiâ

esemplis

""[...] La gnot, massime, mi vegnin iniment tropis robis… E o rumii … o rumii…""

gjavât fûr di "Mariute" di Ercole Carletti

"“Doman la fronti, - al rumiave dentri di lui. - Doman o devi spiticâmi. ”"

gjavât fûr di "Îr e doman" di Gianni Gregoricchio

rumiâ v.tr.
(ru-mi-â)

Dî alc in maniere pôc clare, ancje fevelant plui par se stes che par chei che a puedin scoltâ (fig.)

sinonims

barbotâ, mastiâ

esemplis

"o crodeis che al basti rumiâ cuatri avemariis par che il Signôr e la Madone a siarin i voi su dutis lis vuestris tristeriis"

gjavât fûr di "Lis predicjis dal muini" di Josef Marchet

monolengâl