SuperDizionari

tirâ fûr loc.v.

Cjapâ e fâ fuarce par che cdn. o alc al vegni fûr

esemplis

"une spine di Signôr, lungje une cuarte, la Madone la à cjapade tun pît, saltant un agâr suiât. [...] La Madone pricure e fâs di dut par tirâle fûr chê spine"

gjavât fûr di "El sborf" di Dolfo Zorzut

"cuant che [il frut colât tal poç] le à viodude bruscje si è metût a sberlâ. E je corude jù agne Vigje, sô none, e lu à tirât fûr pai braçs"

gjavât fûr di "Tinut di Libro" di Pieri Menis

tirâ fûr loc.v.

Cjatâ

sinonims

inventâ, cjatâ, cjatâ fûr, burî, burî fûr

esemplis

"al si met a voltâju, a zirâju e a messjedâju ducj cuancj [i crucifìs] par tirânt fûr un sence pecjis"

gjavât fûr di "Al marcjât di Vile" di Luigi Gortani

tirâ fûr loc.v.

Cjatâ o inventâ e presentâ un argoment, une scuse, une cuistion, un probleme o un truc, une dificoltât e v.i.

esemplis

"lis argomentazions che a tirin fûr a son vueidis di ogni sostance"

gjavât fûr di "Sturm und Drang" di Josef Marchet

"tancj si son fats indenant, cui proponintsi tant che professôr di talian, cui tirant fûr ideis par gjitis e fiestis, cui cu la voie di cognossiju lant a fâ di mangjâ cun lôr [cui forescj rivâts di pôc]"

gjavât fûr di "Un blanc e un neri" di Igor Londero

tirâ fûr loc.v.

Rivâ a otignî

sinonims

rigjavâ, gjavâ, gjavâ fûr

esemplis

""È vignude une femine a domandâmi cemût che veve di fâ par tirâ fûr la legjitime che i spietave a sô mari su la sostance di so nono e che i siei barbis no volevin dâi""

gjavât fûr di "L'avocat e la luianie" di Pieri Somede dai Marcs

"dai ramaçs si tirin fûr fibris par fâ cuardis"

gjavât fûr di "Risorse biodiversitât" di Silvia Battaglia

tirâ fûr loc.v.

Dâ bêçs

sinonims

spiçâ fûr, spudâ, spudâ fûr

esemplis

"nol veve volût savênt di tirâ fûr nancje une palanche"

gjavât fûr di "Îr e doman" di Gianni Gregoricchio

"par tirâ fûr chei cinc mil francs che nus vevin prometût o vin dovût sudâ cent cjamesis"

gjavât fûr di "Lis nestris rosis" di Pieri Somede dai Marcs

tirâ fûr loc.v.

Fâ une ecezion, gjavâ di un cont, di une considerazion, di une categorie e v.i.

sinonims

gjavâ, tirâ vie, gjavâ fûr

esemplis

"che anzit, a fâ il calcul tune anade, une volte tirâts fûr ducj i vinars, lis cuatri timporis, l'avent, la cuaresime e cualchi alc altri di fûr vie, si po dî che cuasi nol vanzave nancje il timp di mangjâ un purcitut tarcjot cence fâ pecjâts cuintri la astinence"

gjavât fûr di "I furlans e la pinitince" di Riedo Pup

monolengâl