Tu âs cirût la peraule
monolengâl
torne indaûr

monolengâl

çate s.f.
(ça-te)
Ognidune des gjambis di un animâl
sinonims
gjambe, talpe
esemplis
"chel cjan, daspò che al à ben vuacât e cu lis çatis raspade la tiare, al alce il music e al si met a urlâ a lunc"
gjavât fûr di "Il cjan blanc di Alturis" di Catarine Percude
"i ai dit che e compri cuatri pontis di ale e lis çatis di un poleç par fâti un pôc di brût"
gjavât fûr di "Un pugn di moscjis" di Pieri Somede dai Marcs
"[lis âfs] àn plenis lis çatis / di polvar di flôr"
gjavât fûr di "Lis âfs" di Pieri Somede dai Marcs
çate s.f.
(ça-te)
Man di une persone (scherç.)
esemplis
"«Cumò avonde, se no ca no si le finìs altri. Cui che al è content di butâ fûr il fiâr che al alci une çate»"
gjavât fûr di "Il figâr dal plevan" di Pieri Menis
çate s.f.
(ça-te)
Talent, capacitât di fâ ben un lavôr, une operazion e v.i.
sinonims
competence, cuele, cundizion, man, scuele, mistîr, art, sgrimie, inzen, momò
esemplis
"al jere stât un professôr di dissegn des scuelis mediis a invoiâlu sun chê strade e a insegnâi dut ce che al saveve. «Al diseve che o vevi çate e fantasie»"
gjavât fûr di "Il timp par ledrôs" di Mario De Apollonia
çate s.f.
(ça-te)
Mieç o segn o espression di une azion, di un interès, di un podê, di agressivitât e v.i. (fig.)
sinonims
sgrife, man
esemplis
"tu prove pense un afâr, un business, un alc che al puedi sucedi te Basse e li tu cjatarâs la çate di Florean almancul une volte su dôs"
gjavât fûr di "Donald dal Tiliment" di Stiefin Morat
"Min al è un presonîr politic intes çatis dai Todescs e dai Ustàs"
gjavât fûr di "Storie di Min" di Ivano Urli
çate s.f.
(ça-te)
Butade di une plante che la che e tocje tiere e je in stât di formâ gnovis lidrîs
esemplis
"ma se il timp al è sut e se si à tiere lizere, si puedin ancjimò meti sot çatis di sparcs"
gjavât fûr di "Ort e cusine" di Emilia Baldassarre
çate s.f.
(ça-te)
Complès di fueis di une plante che a vegnin sù insiemi, di un sôl poc
esemplis
"cualchi çate di indivie clare cui ôrs inriçâts"
gjavât fûr di "Cjase di Dalban" di Maria Forte
"a viodiju simpri insiemi ti pâr che chei doi a sedin vignûts sù insiemi, come dôs rosis tal zardin o dôs çatis di salate tal ort"
gjavât fûr di "Faliscjis" di Cristina Noacco
"sentadis a curâ lis çatis di ardielut"
gjavât fûr di "«...e là four dal nuestri chiamp...»" di Dino Virgili
detulis
"daspò mangjâts i gjambars si supe lis çatis"
"il gjat al va tant al ardiel fin che i lasse la çate"
torne sù