SuperDizionari

gjenar s.m.
(gje-nar)

Complès concetuâl di cjossis o individuis che a àn carateristichis in comun

sinonims

sorte, cualitât, forme, gjernazie, ordin, specie, stîl, tip, varietât, fate

esemplis

"ogni tant li al salte fûr cualchi imprest celtic dal gjenar di chei di La Tène"

gjavât fûr di "Cuintristorie dal Friûl fin sot la Italie" di Josef Marchet

"lis personalitâts plui in viste dal Friûl (linguiscj, storics, economiscj, studiôs di ogni gjenar, artiscj [...])"

gjavât fûr di "Cuarde e savon" di Josef Marchet

"cumò che al veve une cjamare, un lavôr, che nol veve grandis preocupazions materiâls, al veve dentri une spine di altri gjenar"

gjavât fûr di "Prime di sere" di Carlo Sgorlon

gjenar s.m.
(gje-nar)

(filos.) Te filosofie antighe e de Ete di Mieç, categorie di ogjets cun carateristichis in comun, diferents par carateristichis secondariis

gjenar s.m.
(gje-nar)

(biol.) Categorie sistematiche superiôr de specie e inferiôr de famee

esemplis

"il non dal gjenar botanic [dal sclopit, Silene vulgaris] al ven fûr di Silenus, acompagnadôr cjoc di Bac"

gjavât fûr di "Jerbis salvadiis inte cusine furlane" di Giorgio Pascoli

gjenar s.m.
(gje-nar)

Forme di espression, categorie che e cjape dentri oparis artistichis cu lis stessis carateristichis

esemplis

"la musiche furlane e tocje ducj i gjenars: la cjançon di autôr, l'etno folk-rock, il jazz e lis plui gnovis tindincis rock, rap e eletronichis"

gjavât fûr di "Relazion dal Grup di lavôr “Planificazion linguistiche”" di Donato Toffoli

gjenar s.m.
(gje-nar)

Robe che e ven produsude, vendude, comprade

sinonims

ben, prodot, marcjanzie

esemplis

"Carmine al jere su la cjase di Macorit, al veve buteghe di ducj i gjenars e l'apalt"

gjavât fûr di "La aghe da pît la cleve" di Dino Virgili

"co si va te buteghe, si poie jù la cjarte di cent sul banc e si cjape sù il gjenar e, magari, si spiete ce che al ven indaûr di becins"

gjavât fûr di "Lis predicjis dal muini" di Josef Marchet

gjenar s.m.
(gje-nar)

Il fat di jessi un individui masculin o feminin

esemplis

"lis feminis che a partegnin a di une comunitât minorizade si cjatin a vivi doi nivei di opression: nazionâl e di gjenar"

gjavât fûr di "Teritoris - Oms di Libertât" di Carli Pup

gjenar s.m.
(gje-nar)

[TS] (gram.) Categorie presinte in diviersis fameis linguistichis che e met in oposizion nons, pronons, adietîfs in masculins e feminins o ancje neutris

esemplis

"il talian in pratiche nol à morfologjie pe declinazion (formalmentri al ten par so cont par nons e adietîfs dome il numar e il gjenar)"

gjavât fûr di "Corpus linguistics" di Vladimir Petkevic

monolengâl