SuperDizionari

monolengâl

masanâ v.tr.
(ma-sa-nâ)

Ridusi in tocuts, in grignei o in polvar, cuntune muele o cun altris imprescj, soredut in riferiment ae farine (ancje ass.)

esemplis

"Rita e masanà il cafè e e implenà la napoletane di aghe, po e le tal tinel a cjoli lis cjicaris e i platuts"

gjavât fûr di "Prime di sere" di Carlo Sgorlon

"a puartavin a masanâ intun mulinut plui injù, di ca da la aghe, là di Molâr, che al jere ancje il batefiar e i pestei pal formenton e pal vuardi"

gjavât fûr di "La aghe da pît la cleve" di Dino Virgili

Viôt ancje: masenâ, masinâ, mosenâ

masanâ v.tr.
(ma-sa-nâ)

Mastiâ, mangjâ (fig.)

sinonims

mastiâ, mangjâ, gramolâ, parâ jù, crustâ

esemplis

"un toc di temul che nol fevelave trop: se i vanzave timp di tirâ flât, tra une bocjade e chê altre, al molave fûr un pâr di blestemis e po al tornave a masanâ"

gjavât fûr di "Lis predicjis dal muini" di Josef Marchet

masanâ v.tr.
(ma-sa-nâ)

Movi e tornâ a movi plui voltis (fig.)

sinonims

menâ, remenâ, messedâ, zirâ, voltâ

masanâ v.intr.
(ma-sa-nâ)

Movisi e tornâ a movisi plui voltis, ancje di alc di imateriâl (fig.)

sinonims

balâ, mulinâ, sgurlâ, messedâsi, remenâsi

esemplis

"ma cenonè si jeve sù un burlaç: / dilunc e di traviars il nûl al svole; / al masane, al masane, e in fin dei fats / co l'à ben masanât a te la mole"

gjavât fûr di "Il Strolic furlan par l'an 1833" di Pieri Çorut

"il pinsîr i masanave dentri, e nol rivave adore a cidinâlu"

gjavât fûr di "Prime di sere" di Carlo Sgorlon

masanâ v.tr.
(ma-sa-nâ)

Pensâ e tornâ a pensâ plui voltis, soredut alc di negatîf o problematic (fig.)

sinonims

rumiâ, clucî

esemplis

"Delchi al veve vût dut il timp di roseâsi e di masanâ i siei pinsîrs"

gjavât fûr di "Delchi" di Gianni Gregoricchio

"Carlin al taseve, si viodeve che al masanave dentri di se e agne Menie lu lassà rumiâ i siei pinsîrs"

gjavât fûr di "Chei di Muraie" di Pieri Menis

masanâ v.tr.
(ma-sa-nâ)

Fâ dams, ridusi in brutis cundizions, ridusi in nuie, sedi a nivel fisic e materiâl, sedi a nivel psicologjic, spirituâl e v.i. (fig.)

sinonims

gramolâ, sfracaiâ, disfâ, fruçâ, tamesâ, drazâ

esemplis

"cheste societât ciniche e eficientiste ti masane e ti sfracaie"

gjavât fûr di "Sant Jacum, là che al finìs il mont" di Antoni Beline

masanâ v.tr.
(ma-sa-nâ)

Dî jenfri i dincj, dî in maniere pôc clare (fig.)

sinonims

bradascjâ, mastiâ, trabascjâ, barotâ

esemplis

"agne Mine e jere masse impegnade a filâ su lis sôs disgraciis e a masanâ improperiis, diretis a cui che e saveve jê"

gjavât fûr di "Il sium di Lissandri" di Franca Mainardis

"Prin di rispuindi Redo al veve masanât alc fra i dincj"

gjavât fûr di "Îr e doman" di Gianni Gregoricchio

masanâ v.tr.
(ma-sa-nâ)

Fâ une distance, soredut lungje e cun velocitât e indurance (fig.)

sinonims

brusâ, mangjâ, gramolâ, mastiâ

esemplis

"dispès tirant dilunc, come se il cjatâsi framieç la int lu fasès sintî bracât, al masanave chilometros cence fermâsi, rivant fin là che la citât e deventave, un pôc a la volte, paîs"

gjavât fûr di "Tal ospedâl" di Amedeo Giacomini

masanâ v.tr.
(ma-sa-nâ)

Preparâ, fâ che alc al sucedi

esemplis

"si podeve jessi sigûrs che l'avignî al masanave malatiis, dams, dificoltâts, robis che a lavin par ledrôs"

gjavât fûr di "Ombris tal infinît" di Carlo Sgorlon

detulis

"aghe passade no masane"

"aghe passade no masane plui"

"cence aghe no si masane"

"cui che al è prin tal mulin al masane"

"cui che al rive prin tal mulin al masane"

"di Fevrâr cor a masanâ se no la roie si impetrìs"

torne sù