SuperDizionari

mastiâ v.tr.
(mas-ti-â)

Strenzi plui voltis jenfri i dincj ce che si mangje, in maniere di rompilu e impastâlu cu la salive prime di glotilu (ancje ass.)

sinonimi

gramolâ, masanâ

esempi

"si tirave dongje de taule e si meteve a mangjâ biel planc mastiant a lunc e cjalant fûr dal barcon"

da "Prime di sere" di Carlo Sgorlon

"al scomençà a mastiâ cun calme, procurant di gjavâ fûr di chel mangjâ dut il gust che al podeve"

da "Tal ospedâl" di Amedeo Giacomini

Vedi anche: masteâ, mosteâ

mastiâ v.tr.
(mas-ti-â)

Tignî o movi in bocje, ancje no par mangjâ

sinonimi

messedâ, remenâ

esempi

"ogni tant al cjalave dentri pe puarte mastiant la pipe distudade"

da "La aghe da pît la cleve" di Dino Virgili

mastiâ v.tr.
(mas-ti-â)

Dî jenfri i dincj, dî in maniere pôc clare (fig.)

sinonimi

bradascjâ, masanâ, trabascjâ, barotâ

esempi

"vignî in glesie a bati bancs e mastiâ salveregjinis"

da "Lis predicjis dal muini" di Josef Marchet

"il prin a movisi e a cjapâ la puarte, dopo dai salûts e dai compliments, al jere stât il vieli Bastian, che al veve mastiât un "Ogni ben" e se e veve filade"

da "Trê feminis" di Gianni Gregoricchio

mastiâ v.tr.
(mas-ti-â)

Cognossi, fevelâ un pôc une lenghe foreste (fig.)

sinonimi

mastiuçâ, messedâ

esempi

"ti vualmavin la tratore more che cualchi peraule di todesc le mastiave ancje"

da "Come tai romançs" di Alan Brusini

mastiâ v.tr.
(mas-ti-â)

Pensâ e tornâ a pensâ plui voltis, soredut alc di negatîf o problematic (fig.)

sinonimi

rumiâ, clucî

esempi

"dome che al pos mosteâ pinseirs, gloti grops di recuarts"

da "Paron Salvadi" di Novella Cantarutti

mastiâ v.tr.
(mas-ti-â)

Fâ une distance, soredut lungje e cun velocitât e indurance (fig.)

sinonimi

brusâ, mangjâ, gramolâ, masanâ

esempi

"al veve mastiât tancj di chei chilometris che si sintive dut infurmiât; in plui, si jere supât par dute la strade lis cjacaris, mo par talian mo par francês, di Odile"

da "Il sium di Lissandri" di Franca Mainardis

monolingue