SuperDizionari

monolengâl

pês s.m.

[FO] (fis.) Fuarce esercitade di un cuarp par efiet de gravitât de Tiere sore di un altri che lu ten sù

esemplis

"la densitât dal aiar, ven a stâi il so pês par metri cubic, che al dipent dal numar di particulis che a son par ogni metri cubic, e je plui alte dongje de superficie e plui basse ad alt"

gjavât fûr di "Notis di meteorologjie pal Friûl - Vignesie Julie" di Stefano Micheletti, Marcellino Salvador

"il so braç al tignive memorie dal pês di ogni palade di stancol… Ogni bochin tantis paladis… E nol sbaliave di une once. Come se al fos stât il cûr a sintî il pês"

gjavât fûr di "La tiere di Lansing" di Maria Forte

pês s.m.

Cuarp sogjet a fuarce di gravitât

esemplis

"Toni, il sac al è tornât parsore aghe. Cumò i ai metût un pês, e tu torne a butâlu"

gjavât fûr di "Toni Mat" di Maria Forte

pês s.m.

Toc metalic doprât par pesâ

esemplis

"a 'ndi è che a robin ogni dì, di agns e agns incà, o su lis misuris o sui pês o sul marcjât o sul lavôr o su lis tassis o su altris afârs"

gjavât fûr di "Lis predicjis dal muini" di Josef Marchet

"e restà cu la belance in man e il pês che al dispicjave par tiere"

gjavât fûr di "La fortune di Folope" di Maria Forte

pês s.m.

Malstâ, spec. sensazion di pression tal pet o tal stomi, dificoltât di digjerî o di respirâ (fig.)

sinonims

grop

esemplis

"Tite si svee… al sint come un grant pês sul pet…"

gjavât fûr di "Vencul" di Checo Tam

pês s.m.

Compit di responsabilitât, responsabilitât che e domande impegn e fadie (fig.)

sinonims

cjame

esemplis

"di cualchi an e puartave di bessole dut il pês de numerose famee"

gjavât fûr di "La brût" di Catarine Percude

pês s.m.

Cundizion di fastidi, di dolôr fisic o morâl (fig.)

sinonims

grop, cjame

esemplis

" chel pês [il sens di colpe] lu à tignût lontan di ducj e di bessôl; masse di bessôl e cul cûr come inzessât"

gjavât fûr di "La tiere di Lansing" di Maria Forte

"la solitudin… Ce pês su la anime! La solitudin e cove dentri di me"

gjavât fûr di "Trê feminis" di Gianni Gregoricchio

pês s.m.

Impuartance, capacitât di produsi un efiet (fig.)

sinonims

inflùs, impat, impuartance, influence

esemplis

"tal imagjinari coletîf i fenomens no son sintûts daûr dal lôr pês obietîf su la societât, ma daûr di trop e di cemût che si fevele di lôr"

gjavât fûr di "Il Friûl tra conflit invisibil e alienazion" di Sandri Carrozzo

"la publicitât e veve un pês [economic] fuart, ancje se no suficient par tignî sù l'imprest di informazion"

gjavât fûr di "Un Friûl difarent: i 90 mhz di Onde Furlane" di Max Mauro

pês s.m.

[CO] (sport) Imprest di metal par fâ esercizi fisic, par fâ lavorâ i muscui cuintri de fuarce di gravitât

pês s.m.

[TS] (sport) Sfere di metal doprade in atletiche intes garis di lanç

pês s.m.

Robe o persone che e da fastidi, che no covente, che no zove (fig.)

esemplis

"i partîts talians e i lôr soldaduts a son dome un pês"

gjavât fûr di "I partîts talians e i lôr soldaduts a son dome un pês" di Dree Valcic

detulis

"a chel pês che si compre, bisugne vendi"

"cui che al tire il cuartês che al puarti il pês"

"i purcits si ju stime a pês"

"pês e misure a devin jessi, il contrat al è libar"

torne sù