SuperDizionari

monolingue

persone s.f.
(per-so-ne)

Individui de raze umane

esempi

"i parons di chest mont a odein lis personis; a volaressin vê dafâ nome cun pipins [...]. Invezit une persone e à la sô fisionomie, la sô stature, il so cerviel, la sô cussience, la sô culture, il so gust, il so costum"

da "Personis e pipins" di Josef Marchet

"jê e veve simpri cjalât, dal bas de sô buine semplicitât, lis personis che a vevin un grant savê e lis lôr peraulis a restavin fermis, tal so cjâf, come tes lapidis"

da "Cjase di Dalban" di Maria Forte

persone s.f.
(per-so-ne)

Complès des carateristichis psicologjichis che a individuin un om o une femine e che si manifestin tal so compuartament

sinonimi

personalitât

esempi

"jo lu vevi preseât tant che inteletuâl di prin ordin cuant che lu vevi vût professôr di religjon al liceu, [...] ma la sô persone mi entusiasmà ce tant di plui cuant che si manifestà inte sô dimension politiche furlaniste"

da "Memoriis di politiche linguistiche" di Adrian Cescje

"la puntiliositât e la coerence a fasevin part de sô persone, dal so mût di jessi"

da "La olme di un grant furlan" di Erika Adami

persone s.f.
(per-so-ne)

Cuarp, linie o aspiet dal cuarp

sinonimi

aste, cuarp, personâl, vite, figure, forme

esempi

"ducj i moviments de sô persone a fasin viodi il scombati des ideis te sô anime"

da "Gnot di Nadâl" di Pieri Somede dai Marcs

"Lulù, invezit, e poià la sô persone su la spuinde dal jet"

da "Eivissa mon amour" di Fabian Ros

persone s.f.
(per-so-ne)

[TS] (teol.) Te teologjie cristiane, ognidune des trê figuris che si manifeste la Trinitât

esempi

"[la glesie] e je intitulade a un dai dogmis fondamentâi de glesie catoliche, chel de homousia, ven a stâi de divinitât compagne des trê personis dal Pari, dal Fi e dal Spiritussant"

da "Puçui - Glesie de Santissime Trinitât " di Aministrazion Publiche

persone s.f.
(per-so-ne)

[TS] (gram.) Carateristiche morfologjiche dal pronon e dal verp che e segnale une relazion direte di cui che al fevele cul sogjet che al scolte

esempi

"o presentarìn dome une note a rivuart dal pronon interogatîf, dai numerâi e dai pronons personâi di tierce persone"

da "Cualchi ipotesi sul furlan di prin di scrivilu" di Zorç Cadorin

persone s.f.
(per-so-ne)

[TS] (marcj.) Dimension aprossimative che e permet a un om o a une femine di stâ distirât comut, tignude tant che indicazion tal cumierç di jets, materàs, bleons e v.i.

esempi

"al à cjapât il telâr dal grant jet che lui al doprave di une persone e mieze e lu à seât par traviers"

da "Siôr Celso e mister Donald" di Riedo Pup

proverbi

"chê persone che no ten la mortificade, no vignarà mai ni buine ni brave"

"lis personis si cognossilis tal voli"

"si da il bundì e il bon an daûr de persone"

Torna in Cima