SuperDizionari

regule s.f.
(re-gu-le)

Ordin costant che si manten intal svilup di une cierte cjadene di fats

sinonimi

leç

esempi

"i cambiaments des lunis si po induvinâju, cuntun calcul di nuie, a secui di distance: a van daûr di une regule che no po falâ se dut il firmament nol va in grum"

da "Preambul rusin" di Josef Marchet

regule s.f.
(re-gu-le)

Formule che e fisse il mût di fâ intun ciert câs o intune ativitât, determinade di une autoritât, di une convenzion, di une tradizion, di une esperience e v.i.

sinonimi

leç, precet, norme

esempi

"al veve di esisti dal sigûr cualchi sorestant metût li a fâ rispietâ lis regulis di chei che a comandin"

da "Visâsi di chel puint radio" di Agnul di Spere

"Pauli Brian al è un di chei cudumars che a crodin di mostrâsi brâfs infotantsi di dutis lis regulis dal vivi"

da "Lis predicjis dal muini" di Josef Marchet

"o levi a provis di bande cul vecjo mestri Silvio, chel che nus insegnave lis regulis dal Pentograma, come che lu clamave lui"

da "Avengers" di Checo Tam

"ogni toc [dai scacs] si môf daûr di regulis precisis e ancje particolârs"

da "Zuìn di scacs" di Nilde Teresa Negro

regule s.f.
(re-gu-le)

[TS] (mat.) Metodi pratic pe soluzion di problemis o pe esecuzion di calcui

regule s.f.
(re-gu-le)

[TS] (religj.) Complès di normis e prescrizions fondamentâls che a dissiplinin la vite di un ordin religjôs

esempi

"nissun nol à vût il cûr e la onestât di fermâlu, di judâlu a stâ tal so puest, a onorâ la sô tonie e la sô regule"

da "Un frari pôc fedêl" di Antoni Beline

"il mont monastic [...] al veve une diete principalmentri vegjetariane, la cjar dal purcit e ven dispensade come medisine pai fradis che si inmalin. Si lu lei te regule di Sant Benedet"

da "Il purcit: dal "tragos" grêc a chel furlan" di Angelo Floramo

regule s.f.
(re-gu-le)

[TS] (ling.) Prescrizion di un ciert ûs linguistic

sinonimi

leç

esempi

"un model diferent di manuâl, cuntune part che e introduseve la alfabetizazion par regulis esplicitis e esercizis di pueste par ogni regule di scriture"

da "Memoriis di politiche linguistiche" di Adrian Cescje

regule s.f.
(re-gu-le)

Moderazion, ecuilibri savi e just tal vivi, tal fâ lis robis o intune singule azion

sinonimi

ordin, control, fren, moderazion, ecuilibri, sintiment, misure, criteri

esempi

"jo e la mê femine o sin lâts in cercje di tirâ sù i fruts cun regule"

da "La foghere" di Luciano Rocco

regule s.f.
(re-gu-le)

Cundizion normâl, ordenarie, solite

sinonimi

solit, norme, normalitât

esempi

"une classe pulitiche regjonâl pôc o par nuie cussiente dal valôr de specialitât, che a varès di jessi la regule, no la ecezion tes regjions talianis"

da "Preambul di Friuli. Autonomia e territorio" di Gianfranco Ellero, Gjeremie Gomboso

monolingue