SuperDizionari

tra prep.

Par introdusi un complement di lûc, ancje figurât, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât

sinonimi

injenfri, par jenfri, tramieç, fra, jenfri

esempi

"o sin jessûts tra dôs filis di soldâts cu la baionete in cane che a maledivin, che e pocavin nome se o fossin lâts fûr di file"

da "Il «miracul» di un ûf" di Pieri Menis

"une strade a magne, scure e scjafoiade tra lis monts"

da "Il svindic di Rosute" di Alan Brusini

"i saveve di mâr il stâ dut il dì in ufici tra tantis cjartis, massime di Istât"

da "La sûr" di Pieri Somede dai Marcs

tra prep.

Ancje in espressions fig., cun sfumadure di significât di compagnie e union

sinonimi

framieç, injenfri, par jenfri, tramieç, jenfri, fra

esempi

"in famee, intes situazions di ogni dì, intai rapuarts tra compagns di scuele e coleghis"

da "Relazion dal Grup di lavôr “Planificazion linguistiche”" di Donato Toffoli

"tra noaltris furlans si fevelave simpri par furlan"

da "Interviste a Dino Zoff" di Christian Romanin

tra prep.

Par pandi confront, alternative, diference, o ancje mancjance di diference, di plui personis o entitâts

sinonimi

jenfri, fra

esempi

"par vie de grande diference tra la temperadure dal mâr, plui cjalt, e l'aiar frêt, e nas une instabilitât fuarte"

da "Notis di meteorologjie pal Friûl - Vignesie Julie" di Stefano Micheletti, Marcellino Salvador

"la distance teoriche cussì ben esplicitade tal dî lis robis no podeve sei plui grande tra Salvi e Barbine"

da "Memoriis di politiche linguistiche" di Adrian Cescje

tra prep.

Denant di tiermins no antitetics, al pant une sume parziâl o cumbinazion di elements

sinonimi

jenfri

esempi

"tra il cjalt, tra la int e tra il strenzi, a Jacum no i vignive il flât"

da "Jacum in zardiniere" di Angelo Covazzi

tra prep.

Par introdusi un complement di timp, indicant un tiermin futûr rispiet a cuant che si fevele

sinonimi

ca di, fra, in

esempi

"tra mancul di un mês e sarà une altre volte la zornade dai 3 di Avrîl, la “Fieste de Patrie dal Friûl”"

da "La Patrie, la Fieste e la propueste di leç regjonâl" di Marc Stolf

"i doi si saludarin restant in peraule di sintîsi tra une setemane"

da "Cemût pesâ la tiere" di Angelo Covazzi

monolingue