SuperDizionari

vôs s.f.

Emission di suns fate des personis par fevelâ, cjantâ, clamâ e v.i.

esemplis

"la Penze e saludave a man e vôs, stant su la puarte"

gjavât fûr di "La aghe da pît la cleve" di Dino Virgili

"cuant che il cjan al fermave di vuacâ al sintive lis vôs e i sunsûrs de cene dentri cjase"

gjavât fûr di "Prime di sere" di Carlo Sgorlon

vôs s.f.

Timbri o caratar di chê emission di suns

esemplis

"si sintive a cjaminâ int, a lâ e tornâ, po ancjemò a vaî une vosute cree, ma vive vive"

gjavât fûr di "Chei di Muraie" di Pieri Menis

"une vôs grocjose e zigà, a dute gnot, di colp, a fuart, che e parè li difûr, tal curtîl"

gjavât fûr di "La aghe da pît la cleve" di Dino Virgili

""Ti cognòs, ti cognòs" al sgrasaiave cu la vôs grocje"

gjavât fûr di "Il Bulo di Crodio" di Maria Forte

"il vieli si jere dreçât su lis spadulis e al fevelave cu la vôs sclendare "Tavin… no stâ fevelâ cussì di Tavin!""

gjavât fûr di "La aghe da pît la cleve" di Dino Virgili

"i berlà lis domandis muse cuintri muse, cun vôs di orcul"

gjavât fûr di "Trê feminis" di Gianni Gregoricchio

"la Morane e jere une femenone ruane, ma no beveve, cuntune vosate di om"

gjavât fûr di "Chei di Muraie" di Pieri Menis

vôs s.f.

Viers di un animâl

sinonims

viers

esemplis

"e rivave la vôs dai rusignûi che a si clamavin tes boschetis dulintor"

gjavât fûr di "Come tai romançs" di Alan Brusini

"e vignive jù dal bosc une vôs di uciel…, nete, come di risultive"

gjavât fûr di "La tiere di Lansing" di Maria Forte

vôs s.f.

Sunôr di un strument musicâl

esemplis

"la cjampane di Toresele e veve une vosute lizerine, e chê di Dargnà i lave daûr cun chê vôs tonde"

gjavât fûr di "La aghe da pît la cleve" di Dino Virgili

vôs s.f.

Sunsûr, businament produsût di alc, di cualchi fenomen naturâl

esemplis

"cumò chê vôs dal flum cun chel mugulâ o cisicâ come un che al feveli di sotvôs… e fâs pôre, cumò, a sintîle chê vôs"

gjavât fûr di "La aghe da pît la cleve" di Dino Virgili

"a fâti scjassâ e sdrondenâ cussì a bastarès nome il businâ feroç de aghe, nome la vôs dal Tiliment"

gjavât fûr di "Donald dal Tiliment" di Stiefin Morat

vôs s.f.

Sunôr di trasmissions radiofonichis, televisivis, in proiezions cinematografichis

sinonims

sun, sunôr, volum, audio

esemplis

"i pareve di cjatâsi dentri di un film cence vôs… al continuave a no sintî nuie"

gjavât fûr di "Fantasimis a Sant Martin" di Checo Tam

vôs s.f.

Ce che al ven dite di cdn. par proteste, par clamâ, visâ, dâ une opinion o un consei e v.i. (fig.)

esemplis

"mi spieti che te conference ducj a scoltedin la vôs autonomiste che e domande la tutele identitarie"

gjavât fûr di "Memoriis di politiche linguistiche" di Adrian Cescje

"[la Assemblee de Comunitât Linguistiche Furlane] e à vût vôs in cuistions di tutele dai dirits linguistics"

gjavât fûr di "La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî" di Sandri Carrozzo

vôs s.f.

Ce che al puarte messaçs, ideis, ricuarts e v.i. (fig.)

esemplis

"chel grum di robis vieris, a son la vôs di so pari"

gjavât fûr di "Par stradis lungjis" di Alan Brusini

"l'unic gjornalisim radiotelevisîf che al rivave a sei vôs dal Friûl, vôs autonomiste, vôs moderne e zovine [...] al jere chel di Radio Onde Furlane"

gjavât fûr di "Memoriis di politiche linguistiche" di Adrian Cescje

vôs s.f.

Sburt interiôr che al puarte a fâ, pensâ o decidi alc (fig.)

esemplis

"e scugnive scoltâ chê vôs di afiet che i stave tal sanc. Scoltâ l'amôr pai fîs che a vuelin la mari simpri sante e mai femine che e svarii tes passions"

gjavât fûr di "Cjase di Dalban" di Maria Forte

"«Tu scugnis» mi diseve une vôs dentri di me, flevare ma clare, plene di autoritât"

gjavât fûr di "Il dolfin" di Carlo Sgorlon

vôs s.f.

Esponent di un ciert cjamp (fig.)

esemplis

"la ocasion e je stade la taule taronde a plui vôs sui temis de educazion plurilengâl"

gjavât fûr di "«Regjon, promôf lis lenghis!»" di Erika Adami

"Tal 1942, an che al segnave i 150 agns de nassite di Pieri Çorut, dôs vôs in particolâr a mostrin di no volê cjapâ part aes celebrazions gjenerâls. A son chês di Pier Paolo Pasolini e Josef Marchet"

gjavât fûr di "Leterature furlane" di Cristina Cescutti

vôs s.f.

Notizie che no si sa di dulà che e ven, e duncje no sigure o ancje che e je false dal sigûr ma che e zire istès (fig.)

sinonims

cjacare, cjampane, gnove, peteç, tabaieç, voghe

esemplis

"al jere destin che i ultins agns di Cavedalis a fossin caraterizâts di marums, par vie di ciertis vôs che si jerin jevadis cuintri di lui"

gjavât fûr di "Zuan Batiste Cavedalis - Une vite esemplâr" di Giovanni Pillinini

"si sintivin a zirâ brutis vôs, ma i triscj a son tancj e ai gjornâi che a disin ben o che a disin mâl nol è nuie ce crodi"

gjavât fûr di "Sant Simon: 28 di Otubar 1917" di Pieri Somede dai Marcs

vôs s.f.

Peraule, vocabul

sinonims

peraule, tiermin, vocabul, leme, jentrade

esemplis

" intun Grant Dizionari Bilengâl Talian Furlan di passe 60 mil vôs patrimoniâls e neologjichis"

gjavât fûr di "Tal non di Fausto Schiavi" di Adrian Cescje

"il manuscrit segnât Raetorom.Fol.14 (str BÖHMER 1885, p. 202) al puarte dôs vôs (cun cetantis sotvôs) di une cercje di dizionari furlan"

gjavât fûr di "Doi autografs di Toni Broili framieç dai manuscrits furlans di Berlin conservâts a Cracovie" di Zorç Cadorin

vôs s.f.

[TS] (reson.) Ognidun dai elements, indotâts di une denominazion, che a son intune liste organiche, intun complès di dâts

esemplis

"la Zonte e à tornât a meti i fonts su cheste vôs cu lis variazions di belanç dal 2011, ma ridusûts di un cuart rispiet a ce che si veve prime"

gjavât fûr di "Sot atac l'avignî de lenghe furlane" di Carli Pup

"tal moment di aprovâ la partizion economiche su lis vôs di spese inte sentade dal Consei di aministrazion dai 11 di Novembar dal 2008, al disè che lui si sarès astignût"

gjavât fûr di "Memoriis di politiche linguistiche" di Adrian Cescje

vôs s.f.

[TS] (mus.) Ognidune des parts melodichis che a formin une composizion polifoniche

esemplis

"lis vendemis sui roncs cjantant vilotis a dôs vôs"

gjavât fûr di "Come tai romançs" di Alan Brusini

"la gnot de sabide di Pentecostis a lavin in procession lustrant la vile, cjantant a dôs vôs une cjançon che e tacave [...] cu lis peraulis “schiarazzola marazzola [...]""

gjavât fûr di "Benandants e Terapeutis / Terapeutidis" di Sandri Carrozzo

monolengâl